“ბარსელონამ”, შესაძლოა, ტრანსფერები ზამთარშივე განახორციელოს

“ბარსელონას” მოახლოებული ზამთრის სატრანსფერო ფანჯარაზე ცენტრალური და ფლანგის მცველის ყიდვა არ სურს. მიუხედავად იმისა, რომ ალბას ალტერნატივად კლუბის აღზრდილი მირანდა მოიაზრება და კლუბს არ სურს ამ პოზიციის გაძლიერება, ერნესტო ვალვერდეს მისთვის ჯერ შანსი არ მიუცია. გეგმებში არ შედის არც ცენტრალური მცველის შეძენა ზაფხულამდე, თუმცა სამუელ უმტიტის ტრავმამ შეიძლება სიტუაცია შეცვალოს.

როგორც ესპანური პრესა იუწყება, “ბლაუგრანას” ალტერნატივა ამჟამად “აიაქსის” 19 წლის ცენტრალური მცველი, მატიას დე ლიგტი მოიაზრება. მანამდე კი კლუბში ოთხი ცენტრალური მცველი იქნება: პიკე, უმტიტი, ლანგლე და ვერმალენი. აღსანიშნავია, რომ ამ 4 ფეხბურთელიდან 3 მემარცხენეა, თუმცა ეს ერნესტო ვალვერდესთვის პრობლემას არ წარმოადგენს.

როგორც უკვე აღვნიშნეთ, საქმეს სამუელ უმტიტის ტრავმა ართულებს. ჯერჯერობით უცნობია, როდის დაბრუნდება ფრანგი ცენტრალური მცველი მოედანზე და კლუბის ტექნიკოსებს რამონ კანალთან, პრუნასთან და იანგუასთან (ექიმები, რომლებიც უმტიტის მკურნალობის კურსს ხელმძღვანელობენ) მუდმივი კონტაქტი აქვთ.

რა თქმა უნდა, არავის სურს ნაჩქარევი გადაწყვეტილებების მიღება და “ბარსელონა” ექიმების საბოლოო დასკვნას ელის. ჯერჯერობით, სამუელს ოპერაცია არ ჩატარებია და ექიმები ამის თავიდან არიდებას ცდილობენ. მიუხედავად იმისა, რომ ფეხბურთელთა მკურნალობა “ბარსელონაში” უმაღლეს დონეზეა აყვანილი, არაა გამორიცხული, ეს საფრთხე თავიდან მაინც ვერ აირიდონ და სწორედ ამ შემთხვევაში უნდა ველოდოთ კატალონიური გრანდის გააქტიურებას სატრანსფერო ბაზარზე, რადგან ოპერაციის ჩატარების შემთხვევაში უმტიტი 4-5 თვეს იუქმებს.

“ბარსელონას” დონის ფეხბურთელად კი პირველ რიგში მატიას დე ლიგტი მოიაზრება. მიუხედავად იმისა, რომ გეგმა მისი ზაფხულში გაფორმება იყო, კლუბმა უკვე გადადგა მოლაპარაკების პირველი ნაბიჯები ჰოლანდიურ კლუბთანაც და თავად ფეხბურთელთანაც.

მთავარი ისაა, რომ “ბარსელონაში” თამაში თავად დე ლიგტსაც სურს და ამასთან, წელს ზამთარში გადმოსულ ფეხბურთელებს ჩემპიონთა ლიგაზე მონაწილეობის უფლება ექნებათ, იმის მიუხედავად, ასპარეზობდა თუ არა მათი წინა კლუბი ევროპის ყველაზე პრესტიჟულ ტურნირზე.