ტრავმების ეპიდემია – რა ხდება ბარსელონაში

   სანაკრებო პაუზამდე ვწერდით – კარგი იქნება თუ ყველა ჯანმრთელი დაბრუნდება, წინ მნიშვნელოანი მატჩებია. დაწყებულიც არ იყო ევრო მატჩები, ფეხბურთელებმა რომ ტრავმები მიიღეს და სხვა ტრავმირებულებს შეუერთდნენ. ახლა მხოლოდ ერთი კითხვაა აქტუალური – ვინ მოასწრებს მადრიდამდე გამოჯანმრთელებას? 

გასული სეზონი მახსენდება, მეოთხედფინალური მატჩის წინ “დორტმუნდთან”, კლუბის უმაღლესი ხელმძღვანელები ჟურნალისტებს არაოფიციალურ ბრიფინგზე შეხვდნენ. სამეთვალყურეო საბჭოს წევრებმა ისაუბრეს მოახლოვებულ საკლუბო მსოფლიო ჩემპიონატზე. ერთი მხრივ აღინიშნა რომ კლუბი ვერ გამოიყენებდა იმ ფინანსურ შესაძლებლობებს, რასაც ეს ტურნირი მოიტანდა, მეორე მხრივ კი ითქვა, რომ ფეხბურთელების ჯანმრთელობისთვის ასე უკეთესია. კარგ დასვენებაზე კარგი აღგენა უბრალოდ არ არსებობს. 

„დიდებულია ფეხბურთელებისთვის, რადგან მათ ზაფხულში დიდი დრო ექნებათ დასასვენებლად,“ — თქვა ერთ-ერთმა ხელმძღვანელმა, – „არ ვიცით, როგორ გაუმკლავდებიან ტურნირში მონაწილე გუნდები ასეთ რეჟიმს, ფეხბურთელებს აღდგენის საშუალება ფაქტობრივად აღარ ექნებათ”. 

“ბარსამ” დაისვენა, მაგრამ ამის შედეგი ვერ ვნახეთ, პირიქით, იმდენი ფეხბურთელია ტრავმირებული უკვე ლა მასიას შევსებაც ვეღარ გვშველის. ბოლოს რობერტ ლევანდოვსკი დაშავდა, კუნთის ტრავმა აქვს და მინიმუმ ერთი თვით იუქმებს. რაც ავტომატურად ნიშნავს იმას, რომ ელ კლასიკოს გამოტოვებს. 

ტრავმა მიიღო ოლმომ და დიდი ალბათობით ისიც გამოტოვებს კლასიკოს. ტრავმა მიიღო ფერან ტორესმა, მაგრამ როგორც იწერება მომდევნო ტურშივე მზად იქნება. დაზიანება უმნიშვნელო გამოდგა. 

რაფინიამ ბარძაყის უკანა კუნთის ტრავმა მიიღო, მეკარე ჟოან გარსიამ მენისკი დაიზიანა. უკვე ტრავმირებული იყო ამ დროისთვის საოცარ ფორმაში შესული ფერმინ ლოპესი. ასევე, გავი, რომელმაც ძლივს მოირჩინა უმძიმესი ტრავმა მუხლზე და ისევ შავ დღეში ჩავარდა. ყველაზე დიდხანს უქმობა მას მოუწევს. ტრავმა აქვს ლამინე იამალსაც, ამ ამბავმა ძალიან გააბრაზა ჰანსი ფლიკი, რომელიც მის დასვენებას ითხოვდა, ასევე მოითხოვეს პედრის დასვენებაც, მაგრამ ესპანეთის ნაკრებს სულ სხვა გეგმები აქვს. იამალი სახლში დაბრუნდა და მცირე დატვირთვით ვარჯიშიც დაიწყო. წესით და რიგით, მადრიდისთვის მზად იქნება. 

კინაღამ გამომრჩა ტერ შტეგენი, რომელმაც ზურგის ტრავმა მიიღო და ამას ისეთი ამბავი მოჰყვა დავიწყება როგორ იქნებოდა, მაგრამ გარსიას გადამკიდე მიმავიწყდა. ახლა გარსიამაც ტრავმა მიიღო და ისევ გამახსენა შტეგენმა თავი. “ბარსას” 9 ფეხბურთელი ჰყავს ტრავმირებული და აქედან შვიდი ძალიან მნიშვნელოვანი ფიგურაა. გუნდის შიგნით ქაოსზე საუბრობენ, რადგან ამ ყველაფერს არაფერი მოასწავებდა, ჰანსი ფლიკი პასუხებს ითხოვს, მაგრამ ვერ იღებს. ექიმები ამბობენ, რომ სეზონი სწორად დაიგეგმა, დასვენების დრო საკმარისზე მეტიც კი იყო, ფეხბურთელები კარგ კონდინციაში დაბრუნდნენ, მაგრამ ყველაფერი თავდაყირა დადგა. 

ამბობენ, რომ შეუძლებელი იყო გავისა და გარსიას ტრავმების თავიდან აცილება, მაგრამ სხვა ტრავმების პროფილი გადაღლილობაზე მიუთითებს, სწორედ ასეთ დროს იღებენ კუნთის ტრავმებს, ამას კი ექიმები ვერ ხსნიან. 

“გასულ სეზონში ჩვენი მატჩები ვარჯიშებს ჰგავდა, პირველ ტაიმში წყვეტდნენ მატჩის ბედს და მერე თითქოს ვარჯიშობდა გუნდი, ასე ძალებს ვზოგავდით, ახლა ასე არ არის, ყველა მატჩის მოსაგებად დიდი ძალისხმევა გვჭირდება”, – თქვა სამწვრთნელო გუნდის ერთ-ერთმა წევრმა. (The Athletic-თან ანონიმურად დარჩენა არჩია) 

მომდევნო მატჩისთვის ელიან ფერანის, ლამინესა და ფერმინის დაბრუნებას. თუმცა, მაინც სიფრთხილეა საჭირო. რაფინია ისევ აღდგენით პროცესებს გადის, ოლმოსა და გარსიას თითქმის აღარ აქვთ შანსი ელ კლასიკოსთვის დაბრუნდნენ, ლევანდოვსკი კი ნამდვილად ვერ დაბრუნდება. გავისა და შტეგენზე საუბარიც ზედმეტია. 

ბევრი თვალსაზრისით ეს თვე გადამწყვეტი იქნება, მომდევნო სანაკრებო პაუზამდე. ფლიკის ამოცანაა სეზონის პირველი ნახევარი ისე ჩაამთავროს, რაც შეიძლება ახლოს იყოს მადრიდთან. მეორე ნახევრიდან კი სივრცეც ექნება ცვლილებების გასაკეთებლად. 

არც გასული სეზონის პირველი ნახევარი ყოფილა იდეალური. მერე კი ვნახეთ.. 

“ჟირონა”, “ოლიმპიაკოსი” და “რეალის” ჯერიც მოვა.