“ბარსელონა” იერი მინას გასაყიდად მზადაა

“ბარსელონას” ცენტრალური მცველი, იერი მინა შემდეგ სეზონში კატალონიური კლუბის ღირსებას აღარ დაიცავს, იტყობინება Sport.

წყაროს ინფორმაციით, “ლურჯ-ბროწეულისფერთა” მთავარი მწვრთნელი, ერნესტო ვალვერდე 23 წლის კოლუმბიელ მოთამაშეზე იმედებს არ ამყარებს და მისი ტრანსფერზე განთავსება გადაწყვიტა.

გასულ ზამთარში, 12 მილიონ ევროდ, “პალმეირასიდან” გადმოსულმა მინამ “ბარსას” შემადგენლობაში ადგილის დამკვიდრება ვერ შეძლო, ახლა კი კლუბი მზადაა ან გაყიდოს ის, ან იჯარით გაუშვას.

მოსალოდნელია, რომ ფეხბურთელის ვაკანსიას, ევროკავშირის მოქალაქეობის არქონასთან დაკავშირებით, “გრემიოს” ნახევარმცველი, არტური დაიკავებს, რომელიც კატალონიელებს, სავარაუდოდ, ივლისში შეუერთდება.

მინას კონტრაქტი “ბარსელონასთან” 2023 წლამდე მოქმედებს, გამოსასყიდი თანხა კი 100 მილიონი ევროა. მის მიმართ ინტერესს “ბეტისი”, დორტმუნდის “ბორუსია” და “ფენერბაჰჩე” იჩენენ.