მესის მე-200 თამაში “კამპ ნოუზე”

დღეს, “ალავესის” წინააღმდეგ, ლიონელ მესი “კამპ ნოუზე”, ლა ლიგის ეგიდით, თავის მე-200 თამაშს ჩაატარებს.

განვლილი 199 თამაშის სტატისტიკა ცხადყოფს, რომ “ბარსელონას” საშინაო არენა არგენტინელი ვარსკვლავის სამფლობელოა. ამ 199 შეხვედრაში მესიმ 211 გოლი გაიტანა, რაც თამაშში, საშუალოდ, 1.06 გოლს უდრის.

მესის, “კამპ ნოუზე”, 170 მოგება (85.4%), 18 ფრე (9%) და 11 წაგება (5.5%) აქვს.

“კამპ ნოუზე” ლიონელ მესის დებიუტი 2004 წლის 24 ოქტომბერს, “ოსასუნას” წინააღმდეგ გამართულ მატჩში (3:0) შედგა, როდესაც არგენტინელმა ბოლო 18 წუთი ითამაშა.

პირველი გოლი ლეომ მე-5 ცდაზე გაიტანა. ეს 2005 წლის 1 მაისს, “ალბასეტესთან” 2:0 მოგებულ შეხვედრაში მოხდა.

შესაძლო 17 910 წუთიდან, ლეო მესიმ “კამპ ნოუს” მინდორზე 15 790 წუთი დაჰყო. დარჩენილი 2 120 წუთიდან ყველაზე მეტი, რა თქმა უნდა, საწყის სეზონებზე მოდის, როდესაც ფრანკ რაიკარდი ახალგაზრდა ვარსკვლავს პირველ გუნდს აჩვევდა.

მესის, “კამპ ნოუზე”, 33 გუნდის წინააღმდეგ უთამაშია. მისი ფავორიტები “ესპანიოლი” და “სევილია” არიან – ამ გუნდების კარში მან 15-15 გოლი გაიტანა. შემდეგ მოდის “ატლეტიკო” (14) და “ვალენსია” (13).

დღევანდელი მეტოქის, “ალავესის” კარი, “კამპ ნოუზე” გამართულ შეხვედრაში, მესის მხოლოდ ერთხელ აუღია. ეს 2006 წელს, 2:0 მოგებულ შეხვედრაში მოხდა. მესი თამაშში 71-ე წუთზე ჩაერთო, თავი კი მან 82-ე წუთზე გამოიჩინა.

არგენტინელს საუკეთესო მონაკვეთი 113-დან 125-ე თამაშამდე ჰქონდა, როდესაც მან 22 გოლი გაიტანა. გასულ სეზონში, მან 12 შეხვედრაში მეტოქეთა კარი 20-ჯერ აიღო.