ხავიერ პასტორე – პოტენციური საზაფხულო შენაძენი?

არაა გამორიცხული, უახლოესი ზაფხულის სატრანსფერო ფანჯრის პერიოდში, 26 წლის არგენტინელი ფეხბურთელი კატალონიის დედაქალაქში გადაბარგდეს.

ფრანგული გამოცემა Le10Sport-ის ინფორმაციით, შესაძლოა, ხავიერ პასტორე, რომელმაც “პარი სენ ჟერმენის” ძირითადი მოთამაშის ფუნქცია დაკარგა, “ბარსელონას” ხელმძღვანელობისთვის სამომავლო სეზონისთვის შემადგენლობის გასაძლიერებლად ერთ-ერთი ვარიანტი იყოს.

პასტორე, რომელსაც ლიონელ მესისთან საკმაოდ კარგი ურთიერთობა აკავშირებს, სხვადასხვა შემოთავაზების მოსასმენად მზადაა. ის შესაძლოა, სათადარიგოთა სკამზე ლუის ენრიკეს ერთ-ერთი სანდო ფიგურა გახდეს.

პსჟ-ს მაისურით მიმდინარე სეზონში არგენტინელმა ამ დროისთვის მხოლოდ 14 მატჩი ჩაატარა. როგორც საფრანგეთში ამბობენ, ის პარიზს 25 მილიონი ევროს სანაცვლოდ დატოვებს.

აღსანიშნავია, რომ იტალიიდან სიტუაციას “მილანი” და “იუვენტუსი” აკვირდება. აგრეთვე, ყურადღებითაა ანტონიო კონტე, რომელიც მომდევნო სეზონიდან ლონდონის “ჩელსის” ჩაიბარებს.

პასტორეს გარდა, “ბარსელონას” თავდასხმის გაძლიერების კიდევ არაერთი ალტერნატივა აქვს. სკაუტები “ვესტ ჰემის” რიგებში დიმიტრი პაიეზე დაკვირვებას აგრძელებენ. ნოლიტო კი ლუის ენრიკეს კვლავ მოსწონს.