ასამბლეამ ორი ახალი კომერციული შეთანხმება დაამტკიცა

კომერციული მიმართულებით, შაბათს გამართულმა რიგითმა გენერალურმა ასამბლეამ მწვანე შუქი აუნთო ორ ახალ ხელშეკრულებას, რომლებზეც კლუბი ბოლო თვეების განმავლობაში აწარმოებდა მოლაპარაკებებს.

Ohana Development

პირველი გადაწყვეტილება Ohana Development-ის “ბარსელონას” ახალ გლობალურ პარტნიორად დამტკიცებას ეხებოდა 2029/30 წლების სეზონის ბოლომდე. ახლო აღმოსავლეთის ერთ-ერთმა წამყვანმა დეველოპერულმა კომპანიამ არაბთა გაერთიანებულ საამიროებში “ბარსელონას” ბრენდის ქვეშ საცხოვრებელი კომპლექსის პროექტის განვითარების ლიცენზია 2055 წლამდე მიიღო.

შეთანხმება ასევე მოიცავს სასპონსორო პაკეტს პროექტისა და თავად კომპანიის ბრენდის პოპულარიზაციისთვის 2030 წლამდე. საერთო ჯამში, ეს პარტნიორობა კლუბისთვის ახალ შემოსავლებს უზრუნველყოფს უძრავი ქონების სექტორში ბრენდის ლიცენზირებისა და სპონსორობის გზით.

კომპანიის ლოგო სამი სეზონის განმავლობაში (2027/28-დან 2029/30 წლების სეზონის ჩათვლით) მამაკაცთა და ქალთა პირველი გუნდების მაისურების ზურგზე გამოჩნდება შიდა ტურნირებზე (ლა ლიგა, კოპა დელ რეი და ესპანეთის სუპერ თასი) და ამხანაგურ მატჩებში.

დღის წესრიგის ეს პუნქტი 308 მომხრე ხმით (68%) დამტკიცდა, 103 წინააღმდეგი იყო (23%), 32-მა ცარიელი ბიულეტენი ჩააგდო (7%), ხოლო 10-მა თავი შეიკავა (2%).

Babylon Park

ასევე დამტკიცდა შეთანხმება Babylon Park-თან, როგორც “ესპაი ბარსას” სტრატეგიულ პარტნიორთან. კომპანიამ მიიღო 25-წლიანი ლიცენზია, რათა “სპოტიფაი კამპ ნოუზე” შექმნას და მართოს “ბარსელონას” თემატიკის დახურული საოჯახო გასართობი ცენტრი, რომელიც ვიზიტორებს ფეხბურთთან დაკავშირებულ ინტერაქციულ გამოცდილებასა და ოჯახურ გართობას შესთავაზებს.

მხარეები ასევე იმუშავებენ “ბარსელონას” თემატური გასართობი ცენტრების ეტაპობრივ გახსნაზე მთელ კატალონიაში, სამომავლოდ საერთაშორისო ბაზრებზე გაფართოების პერსპექტივით.

ეს საკითხი 252 ხმით დამტკიცდა (56%), 158 წინააღმდეგი იყო (35%), 31-მა ცარიელი ბიულეტენი ჩააგდო (7%), ხოლო 10-მა თავი შეიკავა (2%).

ამ ორი ხელშეკრულების რატიფიცირებით კლუბი აგრძელებს კომერციული საქმიანობის გაფართოებას, რაც “ბარსელონას” ბრენდის სიძლიერესა და საერთაშორისო კომპანიების მოზიდვის მაღალ შესაძლებლობებზე მიუთითებს.