ენტონი გორდონი: მყისიერი ეფექტი

ელჩეში გამართულმა დასამახსოვრებელმა საღამომ “ბარსელონას” ბევრი კარგი სიახლე მოუტანა. დამაჯერებელი 5-0 გამარჯვების გარდა, ყურადღების ცენტრში საზაფხულო შენაძენებიც მოექცნენ. ერთ-ერთმა მათგანმა, ენტონი გორდონმა თამაში სათადარიგოთა სკამიდან დაიწყო და ოფიციალური დებიუტისთვის 65-ე წუთამდე მოცდა მოუწია, როდესაც მან ლამინ იამალი შეცვალა.

ინგლისელმა შემტევმა საკუთარი თავი მალევე წარმოაჩინა. მოედანზე გამოსვლიდან სულ რაღაც ექვს წუთში მან ორი საგოლე გადაცემა შეასრულა, რაც “ბარსელონას” არცერთ დებიუტანტს ბოლო 15 წლის განმავლობაში არ გაუკეთებია. პირველი ასისტი რაფინიას მისამართით გაკეთდა, რომელმაც ანგარიში 3-0 გახადა და “ელჩეს” თამაშში დაბრუნების შანსი ფაქტობრივად მოუსპო. ორი წუთის შემდეგ, გორდონმა ბრწყინვალე გარღვევა განახორციელა და მეკარესთან პირისპირ აღმოჩნდა. მიუხედავად იმისა, რომ მას “ბარსელონას” მაისურით თავისი პირველი გოლის გატანის შანსი ჰქონდა, ბურთი თანაგუნდელს დაუთმო და ფერმინმაც ზუსტად დაასრულა შეტევა.

ეს იყო ზუსტად იმის დემონსტრირება, თუ რისი მოტანა შეუძლია “ნიუკასლის” ყოფილ მოთამაშეს გუნდისთვის: მისი უნარი, გამოიყენოს თავისუფალი სივრცეები, შექმნას ხიფათი და თანაგუნდელები თამაშში ჩართოს.

თავს ისე გრძნობს, როგორც სახლში

მატჩის დასრულების შემდეგ გორდონი, სავსებით გასაგები მიზეზების გამო, აღფრთოვანებული იყო. კლუბის მედიასთან საუბრისას, ინგლისელმა ფეხბურთელმა თავის დებიუტს საოცნებო უწოდა და ხაზი გაუსვა, რომ ეს მხოლოდ დასაწყისია:

“ეს სეზონის იდეალური დასაწყისია. ჩემთვის კარგი დებიუტი გამოვიდა. კლუბმა უდიდესი ძალისხმევა გაიღო ჩემს მოსაყვანად, ამიტომ ყველაფერი უნდა გავიღო, რაც შემიძლია.”

გორდონმა ასევე ისაუბრა იმაზე, თუ რამდენად სწრაფად მოერგო ახალ გარემოს:

“თავს ისე ვგრძნობ, როგორც სახლში. ქალაქი და ჩემი თანაგუნდელები წარმოუდგენლები არიან. მათ პირველივე დღიდან მაგრძნობინეს, რომ აქ სასურველი სტუმარი ვარ.”