წინასასეზონო ეტაპის პირველი ამხანაგური მატჩი ყოველთვის საინტერესო მოვლენაა. “ბარსელონას” ფეხბურთელები ბოლო ორი კვირაა ინტენსიურად ვარჯიშობენ – ჯერ ესპანეთში, ხოლო ბოლო დღეებში ინგლისში. ახლა კი სათამაშო პრაქტიკის მიღების დრო დადგა.
კატალონიელები სრული შემადგენლობით არ იქნებიან, რადგან მსოფლიო ჩემპიონატზე მყოფი მოთამაშეები გუნდს ჯერ არ შეერთებიან, თუმცა 22:45 საათზე დაგეგმილ მატჩში მაინც ბევრი საინტერესო დეტალია. შეხვედრის ყურება პირდაპირ ეთერში Barça Play-სა და კლუბის ოფიციალურ YouTube არხზე იქნება შესაძლებელი (თუმცა ორივე შემთხვევაში პრემიუმ პაკეტის შეძენაა საჭირო).
მატჩს ბირმინგემელთა საშინაო არენა უმასპინძლებს, რომელიც 29 409 მაყურებელს იტევს. არენა წლების განმავლობაში შეიცვალა, მაგრამ არსობრივად ეს იგივე სტადიონია, რომელსაც კლუბი უკვე 120 წელია იყენებს.
მეტოქე
1875 წელს დაარსებულმა კლუბმა თავისი არსებობის დაახლოებით ნახევარი ინგლისის უმაღლეს დივიზიონში გაატარა. თუმცა, “ბირმინგემ სიტიმ” პრემიერ ლიგაში ბოლოს 2011 წელს ითამაშა. ტრადიციულად, “ლურჯები” თავიანთი თანაქალაქელის, “ასტონ ვილას” ჩრდილში არიან. მათ ლიგა არასდროს მოუგიათ, თუმცა ორჯერ დაეუფლნენ ლიგის თასს (1963 და 2011 წლებში). ამერიკელი მფლობელების, მათ შორის ამერიკული ფეხბურთის ლეგენდის, ტომ ბრედის მფლობელობის პირობებში კლუბი ახლა მშენებლობის პროცესშია. გასულ სეზონში მათ ჩემპიონშიფში მე-10 ადგილი დაიკავეს და მიზნად 2026-27 წლების სეზონში კიდევ უფრო მაღლა ასვლას ისახავენ.
მიმდინარე შემადგენლობაში რამდენიმე საყურადღებო ფეხბურთელია. მათ შორის არიან სამხრეთკორეელი სუნგ-ჰო პაიკი, რომელმაც “ლა მასია” გაიარა და ბოლო მსოფლიო ჩემპიონატზე ითამაშა, ასევე ესპანურ ფეხბურთში გამოცდილების მქონე მოთამაშეები: კარლოს ვისენტე (“ალავესის” ყოფილი ფეხბურთელი), ჯონ სოლისი და პატრიკ რობერტსი (ორივე “ჟირონა”) და უახლესი ტრანსფერი – არგენტინელი ლუის ვასკესი, რომელმაც გასული სეზონის მეორე ნახევარი “ხეტაფეში” გაატარა.
მიმდინარე სეზონში “ბარსელონამ” მხოლოდ დახურულ კარს მიღმა ითამაშა, ხოლო “ბირმინგემ სიტის” გაცილებით დატვირთული გრაფიკი ჰქონდა. მათ უკვე ითამაშეს და მოუგეს ხუთ მეტოქეს, შესაბამისად ოფიციალური სეზონის დაწყებამდე ეს მათი ბოლო მატჩია.
ურთიერთშეხვედრები
“ბარსელონა” და “ბირმინგემ სიტი” ერთმანეთს პირველად 1925 წელს შეხვდნენ, როდესაც კატალონიის დედაქალაქში ორი ამხანაგური მატჩი გაიმართა და ორივე მასპინძლებმა მოიგეს.
პირველი ოფიციალური შეხვედრა ბაზრობათა თასის ნახევარფინალში შედგა. ორი მატჩის ჯამში ანგარიში 4-4 იყო, რის გამოც შვეიცარიაში, ბაზელში პლეი-ოფი დაინიშნა, სადაც “ბარსელონამ” კლუბის ლეგენდების, ევარისტოსა და კუბალას გოლებით გაიმარჯვა.
ამავე ტურნირის მომდევნო გათამაშებაში, ბირმინგემელები გახდნენ პირველი ბრიტანული გუნდი, რომელმაც ევროტურნირის ფინალში ითამაშა. მათი მეტოქე კვლავ “ბარსელონა” იყო. ინგლისში 0-0 დასრულებული მატჩის შემდეგ, კატალონიელებმა “სპოტიფაი კამპ ნოუზე” 4-1 მოიგეს და თასს დაეუფლნენ. მას შემდეგ ეს გუნდები ერთმანეთს აღარ შეხვედრიან.
სიახლეები “ბარსელონადან”
ვინაიდან მსოფლიო ჩემპიონატზე ნამყოფი ფეხბურთელები ჯერ კიდევ არ არიან გუნდთან ერთად, ეს მატჩი ჰანსი ფლიკისთვის იდეალური შანსია, რათა ახალგაზრდებს დააკვირდეს. ებრიმა ტუნკარა, იბრაჰიმ დიარა, შეინ კლუივერტი, ბრიან ფარინიასი და ორიან გორენი შეეცდებიან მწვრთნელზე შთაბეჭდილება მოახდინონ.
რაფინია, რომელმაც ტრავმის გამო ბრაზილიის ნაკრებში თითქმის ვერ ითამაშა, გუნდს უკვე დაუბრუნდა, მაგრამ მისი მოედანზე გამოჩენა ნაკლებად სავარაუდოა. სამაგიეროდ, დიდი შანსია, ვიხილოთ გერმანელი ახალწვეულის, კარიმ ადეიემის არაოფიციალური დებიუტი. “ელჩედან” ერთწლიანი იჯარის შემდეგ დაბრუნდა ექტორ ფორტიც.
ასევე, ეს იქნება კარგი შესაძლებლობა იმის სანახავად, თუ რა ფორმაში არიან ჟერარ მარტინი და მარკ ბერნალი, რომლებიც ესპანეთის ნაკრებში არ იყვნენ გამოძახებულნი და ახალი სეზონისთვის სრულყოფილად ემზადებიან.
forum კომენტარები (0)