ხულიან ალვარესის ალტერნატივები ბარსელონასთვის

“ბარსელონამ” 2-კვირიანი ლიმიტი დააწესა, რათა იმ თავდამსხმელის დასამატებლად B გეგმა აამოქმედოს, რომელიც ფლიკს სჭირდება.

გასულ პარასკევს ხილ მარინმა ხულიან ალვარესის “ბარსელონაში” ტრანსფერს, მისივე აზრით, საბოლოოდ დაუხურა კარი. მიუხედავად ფეხბურთელის სურვილისა, დაეტოვებინა მადრიდის “ატლეტიკო”, მან მოისმინა: “ჩვენი უარი საბოლოოა. ხულიანს არც 100, არც 150 და არც 200 მილიონად არ გავყიდით.” რამდენიმე საათის შემდეგ, “ბარსელონას” პრეზიდენტმა ნიუ-იორკიდან Catalunya Ràdio-სთან საუბრისას უპასუხა: “ერთადერთი, რაც ვიცი, ისაა, რომ შეთავაზება გავაკეთეთ და ის ძალაშია. დადგება მომენტი, როცა ვიტყვით, რომ ჩვენი მხრიდან წინადადების ვადა ამოიწურა. სავარაუდოდ, ეს ივლისის ბოლოს მოხდება.” სხვა სიტყვებით რომ ვთქვათ, ორ კვირაში, და თუ რამე მნიშვნელოვნად არ შეიცვალა, კატალონიურმა კლუბმა ის ალტერნატივები უნდა აამოქმედოს, რომლებიც სპორტულ დირექციას წინასწარ აქვს მომზადებული.

რობერტ ლევანდოვსკის შემცვლელის ძიებაში

“ბარსელონას” სპორტულ დირექციას მაგიდაზე რამდენიმე ალტერნატივა აქვს. საუბარია სხვადასხვა პროფილის მოთამაშეებზე – დაწყებული უკვე შემდგარი, გამოცდილი ფორვარდებიდან, სამომავლო პერსპექტივებით დასრულებული. თუმცა, ერთი რამ ნათელია: ვინც არ უნდა მოვიდეს, მას რობერტ ლევანდოვსკის შეცვლის ურთულესი ამოცანა დაეკისრება და ამხელა წნეხთან გასამკლავებლად სათანადო ხარისხი და მენტალიტეტი უნდა ჰქონდეს.

ჟოაო პედრო

ერთ-ერთი ვარიანტი ჟოაო პედროა. მიუხედავად იმისა, რომ კარლო ანჩელოტიმ ის ბრაზილიის ნაკრების განაცხადში მსოფლიო ჩემპიონატისთვის არ შეიყვანა, ლონდონის “ჩელსის” ფეხბურთელი ძალიან მოსწონს დეკუს, რომელმაც აღიარა, რომ მის გარემოცვას კარგად იცნობს. მას შეუძლია როგორც ცენტრალური, ისე მეორე თავდამსხმელის პოზიციაზე თამაში. ის ახალგაზრდაა (24 წლის) და გასულ სეზონში ლონდონური კლუბის მაისურით 50 ოფიციალურ მატჩში 20 გოლი გაიტანა. მთავარი პრობლემა ისაა, რომ “ჩელსიმ” ის დაახლოებით 80 მილიონ ევროდ იყიდა და მისი გაყიდვის აუცილებლობა არ უდგას. თუ კლუბი ფეხბურთელს ხელშეუხებლად გამოაცხადებს, საეჭვოა “ბარსელონამ” რამე შეძლოს, თუ მაგიდაზე ძალიან დიდ თანხას არ დადებს.

მიკელ ოიარსაბალი

სან-სებასტიანის “რეალ სოსიედადის” თავდამსხმელი, რომელიც ესპანეთის ნაკრებთან ერთად მსოფლიო ჩემპიონატზე ბრწყინავდა, “ბარსელონასთვის” ძალიან კარგი ვარიანტი იქნებოდა. მისი კომბინაციური სათამაშო სტილი ფლიკის გუნდს იდეალურად მოერგება, თანაც ის ნაკრების ბევრ თანაგუნდელთან ერთად ითამაშებდა. ფეხბურთელი კარიერის საუკეთესო პერიოდს გადის და ესპანეთის ლა ლიგასაც იდეალურად იცნობს. მისი ტრანსფერი შესაძლოა 75 მილიონი ევრო დაჯდეს, რაც მისი ასაკის გათვალისწინებით საკმაოდ მაღალი თანხაა. “ბარსელონა” იმედოვნებს, რომ მოლაპარაკებების შემთხვევაში, ამ ციფრის შემცირებას შეძლებს. პრობლემა ისიც არის, სურს თუ არა კლუბიდან წასვლა თავად ფეხბურთელს, რომელიც “რეალ სოსიედადის” კაპიტანია.

ჯუნიორ კრუპი

ყველაზე რისკიანი, მაგრამ ამავდროულად ყველაზე პერსპექტიული ალტერნატივა “ბორნმუთის” ფორვარდი, ჯუნიორ კრუპია. 19 წლის ფეხბურთელის სახელი ბევრი ევროპული კლუბის, მათ შორის დეკუს დღის წესრიგშია. გასულ სეზონში მან პრემიერ ლიგის 33 მატჩში 13 გოლი გაიტანა. მისი განვითარების პოტენციალი უზარმაზარია, მაგრამ კარგი სეზონის შემდეგ ფასიც მკვეთრად გაეზარდა. “ბარსელონასთვის” ცხადია, რომ ფრანგი თავდამსხმელის გამო აუქციონში მონაწილეობას არ მიიღებს.

დუშან ვლაჰოვიჩი

ამ ყველაფრის ფონზე, დუშან ვლაჰოვიჩი საკუთარ თავს კლუბს კვლავ სთავაზობს. თავის დროზე “ბარსელონა” მას განიხილავდა, მაგრამ ახლა სხვა პროფილს ეძებს – არა ტიპურ, გამოკვეთილ “ცხრიანს”, არამედ ისეთს, ვინც საჯარიმოს გარეთაც კარგად თამაშობს და კომბინაციებში ჩართვა შეუძლია. თავდამსხმელმა გადაწყვიტა, რომ ტურინის “იუვენტუსთან” კონტრაქტს არ გაახანგრძლივებს და შეთავაზებებიც ექნება, მაგრამ ცოტა დაცდა და იმის ნახვა სურს, თუ რა მოხდება “ბარსელონას” შემთხვევაში. თუმცა, იმისათვის, რომ კლუბმა მისი ტრანსფერი განიხილოს, სერბმა ჯერ თავისი მაღალი ფინანსური მოთხოვნები უნდა შეამციროს.

ჰარი კეინი – მიუღწეველი ოცნება

რობერტ ლევანდოვსკის მსგავსი ტრანსფერის განმეორება ჰარი კეინთან ერთად, ალბათ, მიუღწეველი ოცნება იქნებოდა. მიუხედავად იმისა, რომ 30 წელს გადააბიჯა (32 წლისაა), ის კვლავ დაუჯერებელ ბომბარდირულ მაჩვენებლებს აფიქსირებს. გასულ სეზონში მან 51 ოფიციალურ მატჩში 61 გოლი გაიტანა. მიუნხენის “ბაიერნი” მის გაყიდვას არ განიხილავს; პირიქით, კონტრაქტის გახანგრძლივება სურთ და ლევანდოვსკისგან განსხვავებით, კეინიც არ ეძებს კარიერაში ცვლილებებს. “ბარსელონა” აფასებს, რომ პოლონელის მსგავსად, ისიც მყისიერი შედეგის მომტანი შენაძენი იქნებოდა, მაგრამ პოტენციური ტრანსფერის ღირებულება და მისი მაღალი ხელფასი ამ ოპერაციას შეუძლებელს ხდის.

ეს სახელები (და შესაძლოა ისეთებიც, რომლებიც მედიაში არ გაჟღერებულა) “ბარსელონას” B გეგმაა იმ შემთხვევისთვის, თუ ხულიან ალვარესის ტრანსფერი გაიწელება. კლუბის სპორტულ დირექციასა და ფლიკს არ სურთ, რომ სატრანსფერო ფანჯარა ცენტრალური თავდამსხმელის დამატების გარეშე დაიხუროს.