მთავრობა მხარს უჭერს, რომ 2029 წლის ჩემპიონთა ლიგის ფინალს სპოტიფაი კამპ ნოუმ უმასპინძლოს

გადაწყვეტილება სამშაბათს ბილბაოსა და “სან მამესის” სტადიონის კანდიდატურასთან ერთად იქნა მიღებული, რომელმაც 2028 წელს ქალთა ჩემპიონთა ლიგის ფინალს უნდა უმასპინძლოს.

სამშაბათს, ესპანეთის განათლების, პროფესიული მომზადებისა და სპორტის მინისტრის, მილაგროს ტოლონის წინადადებითა და ესპანეთის სამეფო ფეხბურთის ფედერაციის მოთხოვნით, მინისტრთა კაბინეტმა დაამტკიცა ესპანეთის მთავრობის მხარდაჭერა ბილბაოსა და ბარსელონას კანდიდატურებზე ევროპული ფეხბურთის ორი უდიდესი მოვლენის მასპინძლობისთვის. საუბარია 2029 წლისთვის დაგეგმილ მამაკაცთა ჩემპიონთა ლიგის ფინალსა და ერთი წლით ადრე, ბილბაოში გასამართ ქალთა ჩემპიონთა ლიგის ფინალზე. პირველი მათგანის განახლებულ “სპოტიფაი კამპ ნოუზე” გამართვის საკითხი განიხილება, ხოლო ბისკაიის ქალაქში შერჩეული სტადიონი “სან მამესი” იქნება.

ამ შეთანხმებით, მთავრობა ადასტურებს თავის მზაობას, ხელი შეუწყოს დიდი საერთაშორისო სპორტული ღონისძიებების ორგანიზებას და ესპანეთის, როგორც უმაღლესი დონის შეჯიბრებების მასპინძლის პოპულარიზაციას, როგორც სპორტული მნიშვნელობის, ისე ეკონომიკური, ტურისტული და სოციალური გავლენის გამო. ბილბაოს მიზანია, 2028 წელს ევროპის ყველაზე პრესტიჟული ქალთა საკლუბო ტურნირის ფინალის ორგანიზება, ხოლო ბარსელონა 2029 წელს კონტინენტური ფეხბურთის უმნიშვნელოვანესი მატჩის მასპინძლობის კანდიდატია.

ჩემპიონთა ლიგის 2029 წლის ფინალის მასპინძლობისთვის “სპოტიფაი კამპ ნოუ” და ლონდონის “უემბლის” სტადიონი იბრძვიან. პირველი მათგანის ტევადობა 2029 წლისთვის 105 ათასი იქნება, მეორესი კი 90 ათასი. UEFA საბოლოო გადაწყვეტილებას მიმდინარე წლის სექტემბერში მიიღებს.