ჰანსი ფლიკის პრესკონფერენცია ელ კლასიკოს წინ

“ბარსელონასა” და “რეალ მადრიდის” მორიგი დაპირისპირების წინ კატალონიელთა მთავარმა მწვრთნელმა ჰანსი ფლიკმა პრესკონფერენცია გამართა. გერმანელმა სპეციალისტმა მომავალ მატჩზე, გუნდში არსებულ განწყობაზე, კილიან მბაპესა და მადრიდში მიმდინარე კრიზისზე ისაუბრა.

მოლოდინი “ელ კლასიკოსგან”

ფლიკის თქმით, გუნდი სრულად კონცენტრირებულია გამარჯვებაზე და არ აქცევს ყურადღებას გარე ფაქტორებს:

“ჩემთვის მთავარია კარგი მატჩის ჩატარებაზე კონცენტრირება. გვსურს, ვითამაშოთ და მოვიგოთ; სწორედ ეს უნდა ვაჩვენოთ და არა ის, თუ რა ხდება სხვაგან.”

“შინ ვთამაშობთ, შესანიშნავი გუნდი და გულშემატკივართა მხარდაჭერა გვაქვს. “ელ კლასიკო” ყველასთვის მნიშვნელოვანია, “რეალ მადრიდისთვისაც” და “ბარსასთვისაც”, და სწორედ ამიტომ გვინდა მისი მოგება.”

“ვიცი, რომ ეს გამორჩეული მატჩია. ის განსაკუთრებულია ყველასთვის – მოთამაშეებისთვის, პერსონალისთვის, მაგრამ სხვა არაფერზე ვფიქრობ, გარდა შესანიშნავი თამაშის ჩვენებისა და გამარჯვებისა. სწორედ ამის ხილვა მსურს.”

“რეალის” კრიზისი და მბაპეს ფაქტორი

პრესკონფერენციაზე ჟურნალისტებმა ფლიკს “რეალ მადრიდის” შიდა კრიზისსა და გასახდელში არსებულ პრობლემებზეც ჰკითხეს, რაზეც მან დიპლომატიური პასუხი გასცა:

“ასეთი რაღაცები მთელ მსოფლიოში ხდება და არა მხოლოდ “რეალ მადრიდში”. მაგრამ ამაზე საუბარი არ მინდა; ეს ჩემი გუნდი არ არის, ეს ჩემი კლუბი არ არის.”

“არ მინდა მადრიდზე საუბარი, რადგან ის ჩემი გუნდი არ არის. მაგრამ, ჩემი გადმოსახედიდან, მთავარია გუნდური მუშაობა.”

გერმანელმა მწვრთნელმა მადრიდელთა მთავარ ვარსკვლავზე, კილიან მბაპეზეც ისაუბრა და მისი შესაძლებლობები ხაზგასმით აღნიშნა:

“კილიან მბაპე მსოფლიოს ერთ-ერთი საუკეთესო ფეხბურთელია. მას უზარმაზარი შესაძლებლობები აქვს; ჩემთვის ის ერთ-ერთი საუკეთესოა.”

“ლა მასიას” მნიშვნელობა და “ბარსას” შიდა სამზარეულო

კითხვაზე, თუ როგორ უმკლავდება იგი გუნდში არსებულ ეიფორიასა და რთულ სიტუაციებს, ფლიკმა “ლა მასიას” აკადემიის როლსა და ფეხბურთელების ერთიანობაზე გაამახვილა ყურადღება:

“როდესაც რაღაც ხდება, ჩვენ ყველა ერთი მიმართულებით მივდივართ. შეიძლება ბევრი რამ მოხდეს, მაგრამ ამას უნდა გაუმკლავდე. ეს არის ერთადერთი გზა.”

“როგორც უკვე ვთქვი, არაფრის შეცვლა არ გვჭირდება. შესანიშნავი სეზონი გვაქვს, ბოლო რამდენიმე მატჩში თავდაჯერებულობა ვაჩვენეთ და ყველაფერი კარგად გავაკეთეთ. ზუსტად ეს უნდა გავაკეთოთ ხვალაც – გავიდეთ მოედანზე და ისევე ვითამაშოთ.”

ფლიკის განცხადებით, წარმატების ერთ-ერთი მთავარი გასაღები ფეხბურთელებს შორის არსებული მეგობრული კავშირი და ჯანსაღი კომუნიკაციაა:

“ხვალ გადამწყვეტი ნაბიჯი უნდა გადავდგათ. ტიტულის მოსაგებად ვთამაშობთ. მთლიანი გუნდი მნიშვნელოვანია, მაგრამ ცხადია, “ლა მასიას” მოთამაშეების შრომა, მათი ფილოსოფია და მენტალიტეტი გუნდს ეხმარება. ხვალინდელი დღე მარტივი არ იქნება; ყველა მაქსიმუმს გაიღებს. ყველა პროფესიონალია და ეს ის არის, რასაც ჩემს გუნდში ნამდვილად ვაფასებ.”

“ერთმანეთთან შესანიშნავი ურთიერთობა გვაქვს. თქვენ ხედავთ კავშირს “ლა მასიას” მოთამაშეებს შორის, რომლებიც ერთმანეთს 12 წლის ასაკიდან იცნობენ. ვერ ვიტყვით, რომ შეცდომებს არასდროს ვუშვებთ, რადგან ადამიანები ვართ და ეს შეიძლება მოხდეს, მაგრამ ჩემი გუნდით ბედნიერი ვარ. ძალიან კარგი კომუნიკაცია გვაქვს და ეს ჩვენს საქმეში მნიშვნელოვანია.”