ლა ლიგა სევილიასა და ბარსელონას თამაშის უვადოდ გადადებას ითხოვს

რამდენიმე წუთის წინ ლა ლიგამ ოფიციალური განცხადება გააკეთა, რომელიც “ბარსელონას” კალენდარში ცვლილებებს ეხება.

ცოტა ხნის წინ ესპანეთის ჩემპიონატის ორგანიზატორებმა კლუბებს უფლება მისცეს სექტემბრის სანაკრებო პაუზის დროს ფეხბურთელები სამხრეთ ამერიკულ ნაკრებებში არ გაეშვათ. ამის მიზეზი ისაა, რომ სამხრეთ ამერიკაში გასამართი ბოლო მატჩები ლა ლიგის მე-4 ტურს თითქმის ემთხვევა და რამდენიმე გუნდი მნიშვნელოვანი ფეხბურთელის გარეშე რჩება.

ლა ლიგის მიერ კლუბებისთვის მიცემული ნებართვა უკანონოდ გამოაცხადა FIFA-მ და ფეხბურთელებს სანქციებით დაემუქრა. შედეგად ესპანელები იძულებულები გახდნენ დათმობაზე წასულიყვნენ.

ლა ლიგის განცხადებიდან ირკვევა, რომ ორგანიზაცია სამართლებრივ ბრძოლას განაგრძობს, მანამდე კი ქვეყნის ფეხბურთის ფედერაციას მე-4 ტურში ცვლილებების შეტანის ინიციატივით მიმართავს. საუბარია 8 თამაშის დროის ცვლილებაზე, ხოლო “სევილია”-“ბარსელონასა” და “ვილიარეალი”-“ალავესის” თამაშების უვადოდ გადადებაზე.

“სევილიასა” და “ბარსელონას” დაპირისპირება 11 სექტემბრისთვისაა ჩანიშნული, თუმცა “სევილიადან” 3 ფეხბურთელი, ხოლო “ბარსელონადან” რონალდ არაუხო 9 სექტემბრის ღამეს სამხრეთ ამერიკაში ითამაშებენ, რაც მათ ესპანეთში დროულად დაბრუნებასა და ძალების აღდგენას გამორიცხავს.