მატჩისშემდგომი მიმოხილვა: აბა დავიწყეთ

ცხელი ზაფხული იყო, ევროპის ჩემპიონები მსოფლიო ჩემპიონებიც გახდნენ, ლამინე იამალმა უკვე მიაღწია იმას, რაზეც მთელი ცხოვრება ოცნებობენ და ისევ თინეიჯერია. მსოფლიო ჩემპიონატის ფინალის გმირმა კი გუნდი დატოვა, წავიდა ენრიკესთან, პარიზში. სხვათა შორის, სადებიუტო შეხვედრაში დუბლიც გაიფორმა. იქ სადაც დემბელე ფეხბურთელად იქცა, არც ფერან ტორესის სახეცვლილება გამაკვირვებს.

გუნდი დატოვა ლევანდოვსკიმაც, წავიდა ლეგენდის სტატუსით, ლევიმ ურთულესი ოთხი წელი გადაგვატანინა, მის გარეშე ამ გზაზე სიარული წარმოუდგენლად რთული იქნებოდა. დამსახურებული ტაშიც მიიღო და დარჩა ადგილი ცარიელი. მიუხედავად იმისა, რომ ფლიკის განკარგულებაში რამდენიმე უნივერსალია, ცხრა ნომერი რა თქმა უნდა, საჭიროა.

მთავარი მიზანი ალვარესია, და გუშინ გამოჩნდა, რომ ალვარესსაც უნდა ბარსაში. უბრალოდ, ყველა სხვაგვარად ავლენს ხოლმე თავის განწყობას, არგენტინელი ყურებჩამოყრილი იყო “ვილიარეალთან” მატჩში. სამაგიეროდ მიქაუტაძემ იფრინა, რომელსაც ასევე სურს ბარსაში თამაში, ჩვენც გვსურს რასაკვირველია, ამაზე მეტად ხომ არაფერი გაგვახარებს.

მანამდე კი გაიხსნა ლა ლიგა და ფორვარდის პოზიციაზე რაფინია ვიხილეთ.

ჟოზე დაბრუნდა

ბარსასთვის ყველაზე გამაღიზიანებელი კაცი მადრიდში დაბრუნდა, მძიმედ დაიწყო, როგორც სჩვევიათ ხოლმე მის გუნდებს. დიდი ხანია ჟოზეს ასეთი კარგი შემადგენლობა არ ჩაუბარებია, არ ჰყავდა ასეთი გუნდი არც “ჩელსიში”, არც “მანჩესტერში”, არც “რომაში” და არც სხვა გუნდებში. თავად თვლის რომ დაბრუნების დროა, მე კი მიმაჩნია, რომ მისი დრო დიდი ხნის წინ წავიდა.

ბოლო კვირების განმავლობაში მთავარი თემა როდრის არჩევანი იყო. მსოფლიოს ერთ-ერთი საუკეთესო ფეხბურთელის, რომელმაც მადრიდში თამაშს ბარსაში თამაში არჩია, ჟოზე გაანაწყენა, სამაგიეროდ, კატალონიელი ქომაგების გული უკვე მოიგო. დიდი ფეხბურთელია, ყველანაერი გაგებით. ევრპისა და მსოფლიოს ჩემპიონობასთან ერთად, ორივე ტურნირის საუკეთესო ფეხბურთელი გახდა და ოქროს ბურთიც ჩაბარდა. იმუშავა გვარდიოლასთან და ჩემპიონთა ლიგის ფინალშიც გადამწყვეტი როლი შეასრულა. ასეთი კაცი მოვიდა ჩვენთან. ჯანმრთელობა ვუსურვოთ, სხვა ყველაფერი თავისით დალაგდება.

მარტივად, დიდი ანგარიშით

მადრიდისგან განსხვავებით ბარსამ თავისი მატჩი მარტივად მოიგო. ხუთი უპასუხო გოლი შეაგდო. უნდა აღინიშნოს ესპარტის გამოჩენა ძირითადში, რომელმაც მშვენიერი მატჩი ჩაატარა. მისი შემხედვარე ბალდეს წასვლა მოუნდა, აბა, ბებერი კანსელუსი არა მგონია შეშინებოდა. ფლიკი ამბობს ესპარტი ფილიპ ლამს მაგონებსო, ეს ხომ უკვე კომპლიმენტია.

ძირითადში იყო ადეიემი, მარცხენა გარემარბის პოზიცია დაიკავა და ისიც მშვენივარდ გაისარჯა, თავისი პირველი გოლიც შეაგდო ტაიმის მიწურულს. ცოტა სიზუსტე აკლდა პასების დროს, ისე კი აგრესიული იყო, გუნდს მეტი სისწრაფე და ინტენსივობა შესძინა. იგივე შეიძლება ითქვას გორდონზე, რომელიც მეორე ტაიმში გაოვიდა მოედანზე და ორი საგოლე პასი მიითვალა, ჯერ რაფინიას გაატანინა, მერე კი ფერმინს ცარიელ კარში. მათი შემხევარე გასაგები ხდება რა სურდა ფლიკს, გერმანელს სურდა, რომ ბარსა გაცილებით სწრაფი გუნდი ყოფილიყო.

“ელჩეს” ბევრი არ შეუტევია და კარგად ვერც ვნახეთ რა ფორმაშია კრისტენსენი, თითქოს წასვლის კანდიდატი იყო, მაგრამ მაინც ფეხზეა და როგორც ჩანს, კარგ ფორმაშიც. ტრავმა მოირჩინა და ფლიკს კვლავ აქვს მისი იმედი.

მატჩის საუკეთესო კაპიტანი იყო, რაფინიამ დუბლი შეასრულა, პენალტი გამოიმუშავა, რამდენიმე კარგი მომენტი გაუშვა ხელიდან და ხულიან ალვარესსაც გაუგზავნა მოსაწვევი. აი, იამალი ჯერ დაღლილია, ისე როგორც წინა ზაფხულში. როგორც ჩანს, მსოფლიო ჩემპიონობაც ისე იზეიმა, როგორც ევროს მოგება და ახლა ვერ გაუგია სად არის.

დასაწყისი კარგია, წინ რა გველის

ბარსა 27 აგვისტოს “ბილბაოს” უმასპინძლებს. არა მგონია იქამდე ცხრიანის ამბავი გაირკვეს, მაგრამ იქნებ გადაწყვიტონ მაინც რაიმე. მერე კი ვნახავთ, გამოვა თუ არ გამოვა.