მატჩისშემდგომი მიმოხილვა: ერთი გუნდი ორი სახით

                       ბარსამ დაგეგმილი სამი ქულა ჩაიწერა. დიდი ანგარიშით მოიგო, მაგრამ მარტივს მაინც არ ვუწოდებდი ამ შეხვედრას. უკვე დადასტურდა, რომ პედრი ერთი თვით გამოაკლდა კლუბს, მის გარეშე კიდევ რთულია თამაში და აგერ, “ოვიედოსთან” ეს კარგად გამოჩნდა. მოედნის ცენტრში კონტროლიც გაჭირდა და ფანტაზიაც მაგრად აკლდათ “ბარსელონელებს”. ეგ კი არა, ბოლო პასიც ფაქტობრივად არ გაკეთებულა მთელი პირველი ტაიმის განმავლობაში. საერთოდ, ერთ-ერთი ყველაზე ცუდი ტაიმი იყო, რაც ბარსას ამ სეზონში ჩაუტარებია. მეტოქე გუნდის ძალასაც თუ მივიღებთ მხედველობაში.

კარგია “კამპ ნოუზე” დაბრუნება. ეს დაცარიელებული ტრიბუნა ცუდად გხვდება ადამიანს თვალში, მაგრამ იმასაც ვხედავთ, რომ სკამები უკვე დამონტაჟებულია, ესე იგი, ბევრი არც არაფერია დარჩენილი, სულ მალე ეგეც გაივსება და ავა 60’000 მდე, ეგ უკვე საქმეა. ბოლოს კიდევ სულ ზედა ტრიბუნებს მიადგებიან, რომელიც მაინც არ ჩანს მატჩის რეპორტაჟის დროს.

ცუდი ტაიმი

შემადგენლობამაც თითქოს ვერ ივარგა. ასეთ მატჩებში შეიძლება მაინც წაუექსპერიმენტო, ფლიკმაც ხომ უნდა ნახოს ვისი ნდობა შეიძლება და როდის. კარში ტრადიციულად გარსია, დაცვის ოთხეული ცოტა უცნაური იყო – ერიკ გარსია, კუბარსი, მალდინი, კანსელუ. ესე იგი, ფლანგებზე ის ხალხი ვნახეთ ვისაც არა ვართ მიჩვეული, ჩავის დროს ვხედავდით ხოლმე, მაგრამ ფლიკის პირობებში მარჯვნივ გარსია და მარცხნივ კანსელუ უცნაური სანახავია. შეტევაში კანსელუ უფრო აქტიური იყო, მაგრამ შედეგი მაინც არ მოუტანია და ვერც იმას ვიტყვით, რომ რაფინია – კანსელუს დუეტი შეთამაშებულს ჰგავდა. ჯერ ვერა, ჯერ არაფერს ჰგავს.

ჟოან გარსიას კი ჰქონდა საქმე, აი, დაცვას ნაკლებად. “ოვიედო” თავის შეტევებს ყოველთვის შორეული დარტყმებით ასრულებდა. მათ შორის, კარშიც მოარტყეს ერთი-ორჯერ. გარსია მზად იყო. კარგად იდგა. აი ბარსამ ვერაფერი შექმნა, რადგან ნახევარდაცვაშიც ცოტა უცნაური ტრიო გვყავდა – კასადო, დე იონგი, ოლმო. პედრი გასაგებია რატომაც არ იყო, ფერმინ ლოპესმა კი დაისვენა პირველ ტაიმში. ესე იგი, ორი მთავარი შემქმნელი მოისაკლისა ფლიკმა და ასე შეტევაც ძალიან რთულია. თავდასხმის სამეული კი გასაგებია – რაფინია, ლევანდოვსკი, ლამინე. არაფერს ჰგავდა ეს პირველი ტაიმი და მხოლოდ ბოლოს შეიქმნა მომენტი, რაფინია ურტყამდა მახვილი კუთხიდან, სხვათა შორის, კარგად დაარტყა, სახიფათოდ, კარშიც მოარტყა და რთული ასაღები იყო, მაგრამ აიღო მაინც მეკარემ და ასე ნულოვანი ფრით გაიყარნენ გუნდები.

მეორე ტაიმში ბევრი რამ იყო შესაცვლელი და პირველი მალდინი შეცვალეს, ყვითელი ბარათიც ჰქონდა მიღებული. მის ნაცვლად კუნდე გამოვიდა და გარსიას გაუცვალა ადგილი. აი, ლამინეს და კუნდეს ნამდვილად აქვთ ქიმია, ესმით ერთმანეთის და იამალიც სულ სხვაგვარად თამაშობს, როცა კუნდე ჰყავს უკან.

გაცილებით კარგი ტაიმი

მეორე ტაიმში ბარსა გაცილებით აქტიური, სწრაფი და აგრესიული იყო. როგორც ჩანს, შესვენებაზე ფლიკმა ხმასაც აუწია და გამოაფხიზლა ფეხბურთელები. ასე თუ გააგრძელებთ ქულასაც ვერ ავიღებთო. ჰოდა, გამოვიდნენ და კარგი პრესინგიც ითამაშეს. პირველი გოლი სწორედ ამ პრესინგს მოჰვა, ლამინემ და რაფინიამ მეტოქის დაცვა შეავიწროვეს, შეცდომა დააშვებინეს, ბურთი მათივე საჯარიმოში დანი ოლმოს მიუვიდა და ზუსტი დარტყმით ანგარიში გახსნა. კარგი გოლი იყო. ოლმოს როგორც წესი, ლამაზი გოლები გააქვს.

სულ რაღაც ხუთ წუთში ანგარიში ორამდე გაიზარდა, ისევ პრესინგი, ისევ ზეწოლა, მეტოქე ისევ შეცდომას უშვებს და ამჯერად რაფინია სარგებლობს. შეიძლება ითქვას, რომ შეაშინა ბოლო მცველი, რომელიც პასის დროს შეცდა, ფეხები აუკანკალდა და მისი პასი ზედმეტად სუსტი გამოვიდა მეკარეზე, რაფინიამ დიდი სივრცე და დრო მიიღო, მეკარის მოტყუენაც შეეძლო, მაგრამ რბილი დარტყმით, მესის სტილში, უბრალოდ თავზე გადაუგდო. ესეც ორით ნული. ესეც ლამაზი გოლი. თავისი საქმე ისევ იდეალურად გააკეთა და მოედნიდან გაიყვანეს. რაფინიას ნაცვლად ფერმინი შემოვიდა, ბალდემ კანსელუ შეცვალა.

მერე იამალის ჯერი მოვიდა, ერთობოდა ფლანგზე, ართობდა ქომაგებსაც. მესამე გოლიც პრესინგსა და მეტოქის შეცდომას მოჰყვა, ისევ ცუდი პასი გააკეთეს, ისევ შეტევა მიიღეს და ამჯერად დანი ოლმოს პასის შემდეგ მატჩის საუკეთესო გოლი შეაგდო ლამინე იამალმა. ნახევარბრუნში, ე.წ მაკრატელა დარტყმით ულამაზესი გოლი გაიტანა. დაგვიბრუნდა ლამინე.

საბოლოოდ, კარგი მატჩი გამოვიდა. ფლიკი მეორე ტაიმით კმაყოფილი დარჩა.

წინ რა გველის

შემდეგი მეტოქე ისევ ჩემპიონთა ლიგაზე გვეყოლება. ამჯერად “კოპენჰაგენი”. წესით ბარსამ უნდა მოიგოს და დაიმკვიდროს ადგილი პირველ რვა გუნდს შორის. მერე ისევ ლა ლიგაა და კალენდარი მარტივია. პედრის არყოფნა ძალიანაც არ უნდა დაგვეტყოს.

აბა, ვნახოთ რა იქნება.