კობი და ბარსა – მეგობრობა გრძელდება

  “სეულთან” შეხვედრაში შენიშნავდით პატარა დეტალს “ბარსას” ფორმაზე, გასვლით ფორმაზე ამიერიდან კობი ბრაიანტის ბრენდის ლოგო იქნება დატანლი, კობის ბრენდი ნაიკის შემადგენელი ნაწილია. რა თქმა უნდა, კარგი წამოწყებაა, ყველა თვალსაზრისით. თვალი გადავავლოთ “ბარსელონასა” და კობის ურთიერთობას. 

ახალი ფორმა 

სხვადასხვა გამოცემებში წავიკითხე “ბარსას” გასვლითი ფორმა ოქროსფერია იმიტომ, რომ “ლეიკერსის” ხაზზე გადაწყვიტეს წასვლა, ეს კამპანიის ნაწილი უნდა იყოსო, მაგრამ “ბარსას” ოქროსფერი ფორმა, საერთოდ არ ჰგავს “ლეიკერსის” ფორმას, აბსოლუტურად სხვა ფერია,  ამით ვერ მოგვატყუებენ, თუმცა, ბევრად კარგი დეტალია ფორმაში ჩადებული, გასვლით ფორმას გველის ტყავის ტექსტურა აქვს, აქ კი მინიშნებაა “შავ მამბაზე”. 

როდის დაიბადა კობის ბრენდი? 

ბრაიანტმა “ნაიკთან” პირველი კონტრაქტი 2003 წელს გააფორმა, ბოლო 2022 წელს, თანამშრომლობა ძალიან ნაყოფიერი გამოდგა, ბრაიანტს თავისი ბრენდის ხაზიც შეუქმნეს, Sheath-ის ლოგოზე ნაიკის დიზაინერმა ერიკ ავარმა იმუშავა, რომელსაც ასევე უმუშავია ბრაიანტის სპორტული ფეხსაცმლის სერიებზე. ავარმა აღნიშნა რომ ბრაიანტის ბრენდის ლოგოს დიზაინი შთაგონებულია სამურაებითა და მათი ხმლებისგან. 

სხვა კლუბთან თუ თანამშრომლობდა? 

არა, ფეხბურთში ეს პირველია, რაც “ბარსელონასა” და ნაიკს შორის დადებული ახალი კონტრაქტის შემადგენელი ნაწილია. “ბარსამ” მომდევნო 14 წლის განმავლობაში ნაიკისგან 1.7 მილიარდი ევრო უნდა მიიღოს. უკვე ცნობილია, რომ კობის ბრენდთან თანამშრომლობა 2027/28 წლების სეზონამდე გაგრძელდება. 

მემკვიდრეობა 

2014 წელს ბრაიანტმა ნიუ იორკერთან ინტერვიუში თქვა – “შავი მამბა არის იდეალური სახე იმისა, თუ როგორი მოთამაშე მინდა ვიყო. ეს ჩემი ალტერ ეგოა, ეს არის ის, რაც ჩემგან გამოდის, ის ცოცხლდება როგორც ჰალკი და მე სხვა ადამიანი ვხდები”. ბრაიანტი გამოირჩეოდა მიზანდასახულობითა და შრომისმოყვარეობით, მენტალური სიმტკიცის თვალსაზრისით ის იყო მოთამაშე, რომელიც ყველაზე ახლოს მივიდა ჯორდანთან. ნაიკმა მისი ზედმეტსახელისა და შრომისმოყვარეობის შედეგად ახალ მარკეტინგულ ხაზს დაუდო სათავე – Mamba Mentality. 

კობის მძიმე პერიოდის გავლა მოუხდა, განსაკუთრებით 2003 წლის საქმის მერე, როცა სექსუალურ ძალადობაში დაადანაშაულეს, შეიძლებოდა პიკზე მიმავალი ისე ჩაესვათ ციხეში, როგორც მაიკ ტაისონი, მაგრამ გადარჩა. მიატოვა ყველა სპონსორმა, გარდა ნაიკისა. პროკურატურამ საქმე ერთი წლის შემდეგ შეწყვიტა, სავარაუდო მსხვერპლმა ჩვენებების მიცემაზე უარი თქვა. კობიმ 2014 წელს აღნიშნა, რომ ეს მამბა მენთალითის შექმნის მთავარი მოტივი იყო, რათა ყველაზე მძიმე დაბრკოლებებსაც გამკლავებოდა. კობი 41 წლის ასაკში დაიღუპა, 13 წლის ქალიშვილთან ერთად. 

რა აკავშირებს ბარსელონასთან? 

კობის ფეხბურთი იტალიაში ყოფნის დროს შეუყვარდა, თამაშობდა კიდეც გართობის მიზნით, მისი ორი საყვარელი კლუბი  “მილანი” და “ბარსელონაა”. იცოდა იტალიურიც და ესპანურიც. 2006-დან 2015 წლამდე კობი “ბარსას” ოთხჯერ ეწვია, როგორც ესპანეთში, ისე აშშ-ის ტურნეში. ასევე, კობის უკავშირდება ერთ-ერთი ყველაზე ცნობლი ამბავი, როცა ESPN-თან რონალდინიოსთან შეხვედრა გაიხსენა, რონიმ მას პატარა მესი წარუდგინა, მაშინ ჯერ კიდევ 17 წლისა, და უთხრა რომ ეს მსოფლიოში საუკეთესო ფეხბურთელი იქნებაო, კობიმ გაიკვირვა – “მე მეგონა შენ იყავი საუკეთესო”, მაგრამ რონალდინიომ მტკიცედ უთხრა, რომ ლეო ყველა დროის საუკეთესო გახდებოდა. 

კობის თანაგუნდელი და მეგობარი იყო პაუ გასოლი, რომელიც “ბარსელონას” აღზრდილია. “ბარსას” ჰქონდა კიდეც განზრახვა კობი კალათბურთში დაებრუნებინა და ორი სეზონი ევროპაში გაეტარებინა, მაგრამ ეს ბრაიანტისთვის საინტერესო არ ყოფილა.