Mundo Deportivo-ს ჟურნალისტის, ჟოან პოკის ინფორმაციით, “ბარსელონა” 2027 წლის ზაფხულში ამერიკის შეერთებულ შტატებში წინასასეზონო ტურნეს გამართვას გეგმავს. კლუბი უკვე აწარმოებს შესაბამის მოლაპარაკებებს, თუმცა ვიზიტი ჯერ საბოლოოდ გადაწყვეტილი არ არის.
კატალონიური კლუბის მარკეტინგის განყოფილება ამჯერად აშშ-ის დასავლეთ სანაპიროზე დაბრუნების შესაძლებლობას განიხილავს. ამასთან, ტურნეს მარშრუტი და ორგანიზაციული საკითხები ჰანსი ფლიკისა და მისი სამწვრთნელო შტაბის მოთხოვნებთან უნდა იყოს შეთანხმებული.
“ბარსელონა” აშშ-ს ზედიზედ სამი წლის განმავლობაში სტუმრობდა. 2022 წელს გუნდის მთავარი ბაზა ფორტ-ლოდერდეილში მდებარეობდა და ტურნე აღმოსავლეთ სანაპიროზე ჩატარდა. 2023 წელს კატალონიელები დასავლეთ სანაპიროზე იმყოფებოდნენ და მნიშვნელოვანი დრო ლოს-ანჯელესში გაატარეს, 2024 წელს კი ორლანდოსა და ანაპოლისში მოემზადნენ.
2025 და 2026 წლებში ამერიკული ტურნეები აღარ გამართულა. ამის ერთ-ერთი მთავარი მიზეზი გადატვირთული საფეხბურთო კალენდარი იყო: 2025 წელს საკლუბო მსოფლიო ჩემპიონატი ჩატარდა, 2026 წელს კი სანაკრებო მსოფლიო ჩემპიონატი.
2025 წლის ზაფხულში “ბარსელონა” იაპონიასა და სამხრეთ კორეას ეწვია, 2026 წელს კი წინასასეზონო შეკრება ინგლისში გაიარა. კლუბის ხელმძღვანელობა ამერიკულ ბაზარს “ბარსელონას” ბრენდის საერთაშორისო განვითარების ერთ-ერთ სტრატეგიულ მიმართულებად მიიჩნევს და ამ რეგიონში ტურნეების განახლება სურს.
2027 წლის ზაფხულში არც მსოფლიო ჩემპიონატი გაიმართება და არც ევროპის ჩემპიონატი. ეს ჰანსი ფლიკს საშუალებას მისცემს, მოსამზადებელი ეტაპის დასაწყისიდანვე თითქმის სრული შემადგენლობა ჰყავდეს განკარგულებაში.
აღსანიშნავია, რომ გერმანელი სპეციალისტი 2024 წლის ამერიკული ტურნეს დროს ანაპოლისის სამხედრო აკადემიის სავარჯიშო ინფრასტრუქტურით ძალიან კმაყოფილი დარჩა. ამჟამად “ბარსელონა” 2027 წლის ტურნეს ორგანიზებაზე მოლაპარაკებებს აგრძელებს.
forum კომენტარები (0)