მატჩისშემდგომი მიმოხილვა: მაღალი პრესინგი და სწრაფი შეტევები

  ესეც მესამე შეხვედრა, ამერიკული ტურნე დასრულდა. “ბარსამ” ამჯერად წააგო, მაგრამ სათამაშო სურათი დიდად არ შეცვლილა, გუნდი სწრაფი ფეხბურთის თამაშს ცდილობს, უშვებს და გააქვს გოლები, სანამ ძირითადი შემადგენლობის მცველები არ დაბრუნდებიან მანამდე კარის მშრალად შენახვაც გაჭირდება, ამიტომ, საგანგაშო არაფერია. ლეაუს, იოვიჩსა და პულიშიჩს ლანგლე ვერ დაიჭერს, ეს უკვე ძველი და კარგად ნაცნობი ამბავია. 

მატჩამდე ორი თემა იყო აქტუალური, ერთი მეტად ერთიც ნაკლებად. გიუნდოგანს უთქვამს “ბარსას” ფეხბურთელებზე ესენი ტვინს საერთოდ არ იყენებენო, უთქვამს ეს ყველაფერი პირზე ხელის აფარების გარეშე, აბა, მესი გიჟი კი არ იყო ყველაფერზე ხელს რომ იფარებდა პირზე, კაცმა არ იცის რას ეჩურჩულებოდა ლუის სუარესს, ილქაიმ კიდე ვერ მოიფიქრა ეს ყველაფერი და პატარა უსიამოვნებაშიც გაეხვა, ჰოდა, გუნდელებსაც დაწყვიტა გული და ქომაგებსაც. 

მეორე და მეტად აქტუალური თემა დანი ოლმოს ტრანსფერია, რომელსაც ბევრი არც არაფერი აკლია დასრულებამდე. “ბარსას” ძალიან აკლია ნახევარდაცვისა და შეტევის დამაკავშირებელი ფეხბურთელი, პედრი და ილქაი მაინც რვიანები არიან და გაუჭირდათ ამ საქმის კეთება, დანი ოლმო კი სწორი კანდიდატია, კონკურენცია ისედაც დიდი იყო მოედნის ცენტრში, ასე რომ, არ არის გამორიცხული ვინმეს წასვლა მოუწიოს, და თუ ვინმე წავა ლამასიელი ნამდვილად არ იქნება. 

ახლა ლაპორტა უილიამსის ტრანსფერზე გადაერთვება, და თუ ესეც შეძლო შეიძლება ითქვას რომ ამ მოცემულობაში მაქსიმუმი იქნება. საერთოდ, დიდი ხანია მილიარდიანი ვალით სასწაულებს სჩადის სატრანსფერო ბაზარზე, ვიღაც ამართლებს, ვიღაც ვერა, მაგრამ მოხერხებულობას ვერ წაართმევ ამ კაცს. 

სწრაფი გოლები 

“მილანმა” სწრაფი გოლით დაიწყო, “ბარსას” დაცვა გაირღვა, იოვიჩმა კუთხე დაკეტა და დაბალ გამჭოლ გადაცემას სწორ ადგილზე დახვდა – 0:1. გავიდა ხუთი წუთი და მეორეც შეაგდეს, “ბარსას” მარჯვენა ფლანგი ისევ ჩავარდა, ამჯერად პულიშიჩმა შეისეირნა საჯარიმოში და მახვილი კუთხიდან ლამაზი გოლი გაიტანა, ნამდვილად არ იყო აუღებელი დარტყმა, მაგრამ შტეგენმა დიდად სწორი პოზიცია ვერ შეარჩია და გოლიც გაუშვა – 0:2. 

აი მერე კი გამოცოცხლდა “ბარსა” და დაიწყო ჩვენი შეტევებიც, ისევ კარგი იყო პაუ ვიქტორი, აქტიურობდა და საერთოდ კარგი სანახავია მისი თამაშის ყურება, თანაც, რაც ითამაშა ამ მოსამზადებელ ეტაპზე ყველა მატჩში რაღაც ღირებული გააკეთა, ახლა რთულია იმის თქმა მართლაც ასეთი გაქანების ფეხბურთელია თუ ეს ამხანაგური ბურთის გორება გვაჩვენებს ასე, გავა დრო და უკეთ გამოჩნდება, ვინ არის და რა შეუძლია. 

პირველი ტაიმის შუაწელს რობერტ ლევანდოვსკიმ შეძლო ანგარიშის შემცირება. ძალიან კარგი გოლი შეაგდო, თავის სტილში, ძველი და ახალგაზრდა რობერტ ლევანდოვსკის სტილში, ერთი რბილი შეხება, ტანით გადაეწყო და მცველს ისე შემოატარა ბურთი რომ მეკარისგან მარცხენა კუთხეში შევარდა. უჰ, კარგი იყო. 

ისევ კასადო და მაღალი პრესინგი

“ბარსამ” ისევ მაღალი პრესინგით ითამაშა, ძალიან ინტენსიურად და აგრესიულად, როგორც ფლიკის გუნდებს სჩვევიათ. აქ კი ერთი კითხვა გაჩნდა – შეძლებენ ვეტერანები ასე თამაშს მთელი სეზონის განმავლობაში? ლევანდოვსკისა და გიუნდოგანს ცოტა არ იყოს გაუჭირდათ, ხარისხი მათ თამაშში გაცილებით დიდი იყო, მაგრამ სარეზერვო გუნდიდან რომ ეს ახალგაზრდები დაქროდნენ, მათ ტემპში ნამდვილად ვერ ითამაშეს, პრესინგის დროს კი ერთ წამსაც მნიშვნელობა აქვს, უსწრაფესად უნდა ჩაიკეტოს სივრცე ზონებს შორის, თუ ამას ვერ ახერხებ ფლიკთან პრობლემები გექნება. 

ისევ გაიბრწყინეს მარკ კასადომ და მარკ ბერნალმა, აგერ, პრესინგი ვახსენეთ და კასადომ იმდენი იმუშავა ალბათ მთელ გუნდს ერთად არ ურბენია ამდენი. თანაც, 90 წუთის განმავლობაში დარჩა თამაშში. ფაქტია, ფლიკს ძალიან მოსწონს ეს ფეხბურთელი. გარდა ამისა, კარგად შეთამაშებულებიც არიან სეხნიები – ერთმანეთს ერთი შეხედვითაც ვუგებთ – თქვა მარკ კასადომ ბერნალზე და რასაკვირველია ჩავი & ინიესტას ის ცნობილი გიფიც გაგვახსენა. 

პაუ ვიქტორი – ამჯერად პასი 

გოლიც იყო, მაგრამ არ ჩაითვალა, ლევანდოვსკიმ გააკეთა ძალიან ლამაზი საგოლე გადაცემა, ისეთი როგორიც სერჟი რობერტოს აქვს გაკეთებული და მისი კარიერის ყველაზე ლამაზ საგოლე გადაცემად ითვლება, აი, ლევანდოვსკისთვის მაინც უფრო ჩვევაა. შეაგდო ვიქტორმა თამაშგარედან, ცოტა იჯუჯღუნა კიდეც, მაგრამ აშკარად წინ იყო. 

სამაგიეროდ მოგვიანებით როლები გაიცვალა, პაუმ გააკეთა ამჯერად ძალიან კარგი პასი და ლევანდოვსკიმ დუბლი მიითვალა. სწორი პასი იყო, სწორ დროს, ცარიელ კარში, რობერტს ისღა დარჩენოდა ანგარიში გაეთანაბრებინა. ესეც კარგი ნიშანია, “მილანთან” თამაშის მოტრიალება საერთოდ არ არის ურიგო საქმე. 

მერე პენალტები იყო და ჯანდაბას მაგათი თავი, ჰქონდეთ ეს მოგება. 

შემდეგი მატჩი ჟოან გამპერის თასზე, “მონაკოს” წინააღმდეგ შედგება.