მატჩისშემდგომი მიმოხილვა: კლასიკო შედგა

დილა არის მშვენიერი! 

როგორ შეიძლება, ცუდი დღე იყოს, როცა ყველაფერი კლასიკოთი იწყება?! თუმცა, ვისთვის როგორ. წაგებულთათვის ალბათ ცუდია.  როგორც აღვნიშნეთ, კლასიკოში ამხანაგობა არ მოსულა, ყველაფერმა ისე ჩაიარა, როგორც ვივარაუდეთ, ქულები არ დაიწერა, თასი არ გათამაშებულა, მაგრამ მატჩი იყო ნამდვილი, გულწრფელი და კინაღამ სისხლიანიც. 

თავი არავის დაუზოგავს, გარდა იმისა, რომ სეზონის წინ ყველა ცდილობს, ძირითადში დაიმკვიდროს ადგილი, ერთგვარი მუქარაც გაისმა თეთრების მისამართით, მუქარა იმისა, რომ რევანშისთვის მზად ვართ. “ბარსა” ლა ლიგის დასაბრუნებლად მზად არის. 

ძირითადი შემადგენლობა მთელი სეზონისას წააგავდა. საინტერესო სურათი ვიხილეთ, ბევრ რამეზე დაგაფიქრებდა, მაგალითად იმაზე, რომ ოთხი ცენტრალური მცველი გვყავს, – პიკე, გარსია, არაუხო და კრისტენსენი, კუნდე კი გზაშია. ამის ფონზე არაუხოს ვხედავთ მარჯვენა ფლანგზე და ვხვდებით, რომ ბოლოჯერ არ გვაქვს ასეთი სურათი. შესაძლოა, მთელი დარჩენილი სეზონის განმავლობაში მარჯვენა მცველად განიხილებოდეს. თუ “ბარსამ” მარჯვენა მცველი არ დაიმატა, ასეც იქნება. 

არაუხოსთვის კი სულ ერთია, თუ გინდა კარში ჩააყენე, ყველგან მხეცია. 

ნახევარდაცვაში ჩვეული ტრიო ვიხილეთ, მშობლის როლში უკნიდან მოთამაშე სერხიო ბუსკეტსი და მის წინ სახლიდან გაქცეული ბავშვები – გავი და პედრი. 

შემტევი სამეულიც ძირითადისას ჰგავდა, მე თუ მკითხავთ, სწორედ ეს იქნება “ბარსას” ძირითადი შემტევი ტრიო – ფატი, ლევანდოვსკი და რაფინია. 

როგორი იყო მათი პირველი მატჩი? მშვენიერი, არაფერი დაეწუნებოდა. 2-3 ტურში ფრენას დაიწყებენ. ლევანდოვსკის ეტყობოდა, რომ პირველი მატჩი ჰქონდა, ჯერ არ ესმის თანაგუნდელების ენა, მათი გადაადგილების არეალი, მაგრამ გამოჩნდა, რომ ძალიან დიდი კაცი დავიმატეთ. ერთ მომენტში რუდიგერი სადღაც ცენტრში დატოვა და ორ წამში უკვე მეტოქის კარის სიახლოვეს იყო, კარშიც დაარტყა და მეკარემ აჯობა. 

რუდიგერს ეს არ აკმარეს და ფლანგიდან ჩართულმა არაუხომ ჩაუქროლა, გაიგდო წინ ბურთი და გადაჯეგა ეს საშიში კაცი. უნდა ვიცოდეთ, რომ ეს დასაწყისია, ყოველ მომდევნო კლასიკოში, ყველა დაძაბულობის შემდეგ, (რაც ამ თამაშშიც ბევრი იყო), ეს ორი გაჩნდება მთავარ ადგილზე, არაუხო და რუდიგერი, ხალხი, რომლისაც უნდა გეშინოდეს. ჯერჯერობით, რუდიგერი არაუხოსთან შედარებით პატარა კნუტს ჰგავდა, ცოტა არ იყოს, გავანაწყენეთ. 

პირველ ტაიმში “ბარსა” ფლობდა უპირატესობას, ცენტრი ჩვენი იყო, “რეალი” კი კონტრშეტევებზე მოდიოდა სახიფათოდ, განსაკუთრებით ვინისიუსი გამოირჩეოდა, არაუხო კარგად უმკლავდებოდა, მაგრამ ერთხელ მაინც გაცდა ბრაზილიელი, სწორედ მის გარღვევას მოჰყვა დიდი საქმის გარჩევა, ბევრი არაფერი იქნებოდა, როდრიგოს რომ თავი არ გამოედო და ბუსკეტსისთვის ხელი არ ეკრა, თუ კეფის მოძრაობით ვიმსჯელებთ, ბუსკეტსმა უთხრა – შე ლაწირაკო მადრიდელოო და საპასუხოდ მისცხო, მერე მოვიდნენ ისინი.. დიდები. კარგი იყო. დებიუტანტები თავიდანვე მიხვდნენ, რაშია საქმე, ეს კლასიკოა. 

მომდევნო ორი მომენტიც ძალიან ჰგავდა ერთმანეთს. ჯერ ჟორდი ალბამ ჩააბარა ბურთი ვალვერდეს, პირდაპირ კარის წინ, შორი იყო, მაგრამ კარგი დასარტყმელი, იმანაც გაისროლა და ძელი შეარხია, შტეგენს შანსი არ ჰქონდა, საერთოდ, ალბას ცუდი მატჩი ჰქონდა. შემდეგ კი იგივე განმეორდა მეტოქის კართან, მილიტაომ ჩააბარა ბურთი რაფინიას, ამანაც კარგად გაისწორა და რივალდოს მსგავსად გაისროლა, – 1:0. ესეც გამარჯვების გოლი. ლამაზი იყო. უკვე ვიცით, რომ დარტყმა შეუძლია, ვიცით, რომ ეს მარცხენა ფეხი გოლებს არ მოგვაკლებს. 

მეორე ტაიმში კარლოს გეგმა ამუშავდა, ჩვენი ბავშვები გავიდნენ მოედნის ცენტრიდან და “რეალის” მოხუცები შემოვიდნენ, დაბრძენებული და მრავალ ომში ნაცადი მოხუცები, კროოსმა და მოდრიჩმა ცენტრი აიღეს, მაგრამ ვერ გამოდგა მათთვის საკმარისი. გოლი ვერ შეაგდეს. “ბარსას” კი ჰქონდა შანსები კონტრშეტევებზე, კესიეს მართებდა გატანა, მაგრამ კურტუამ აჯობა. 

იყო კიდევ ხელბურთი საჯარიმოში.. არ ღირს მაგაზე დროის დაკარგვა. 

კიდევ ერთი საინტერესო სურათი გამოიკვეთა. უკვე მეორე მატჩია ფრენკი დე იონგს დაცვის ცენტრში ვხედავთ, ნახევარდაცვის ცენტრი ამჟამად ნიკომ, კესიემ და სერჟი რობერტომ დაიკავეს. რა თქმა უნდა, მინიშნებაა, რომ ჩავის ფრენკი აღარ სჭირდება. ცუდად კი გამოდის, მაგრამ ასეა ეს ამბავი. “ბარსა” ხარჯავს და ხარჯავს.. დე იონგს კი წასვლა არ უნდა. არ ვიცი, სადამდე გაგრძელდება ეს ამბავი. 

ერთი-ორ კარგ ტრანსფერს კიდევ ველით. ერთი გზაშია, მეორე იცდის. 

“ბარსა” ძალიან კარგი გუნდია. ახლა ყველაფერი ჩავიზეა დამოკიდებული, ხელმძღვანელობისკენ ხელს ვერავინ გაიშვერს, მსგავსი სატრანსფერო კამპანია ძალიან დიდი ხანია, არ გვინახავს. 

შემდეგი მეტოქე “იუვენტუსი” იქნება.