მატჩისშემდგომი მიმოხილვა: სეზონის პირველი ტიტული

 Championeee Championeee – მღეროდნენ ფეხბურთელები მატჩის შემდეგ, გულშემატკივრის გარეშე, მღეროდა ყველა, დებიუტანტებიც და ვეტერანებიც, სეზონის საუკეთესო ფეხბურთელებიც და სათადარიგოთა სკამზე მყარად დამკვიდრებულნიც, ჩემპიონობას ასეთი ემოცია მოაქვს, ყველას ერთნაირად უხარია და ეს სიხარული ნიღაბს მიღმა არ იმალება, ჟოან ლაპორტას კმაყოფილების დასანახად გაბრწყინებული თვალებიც საკმარისი იყო.

ალე! ალე! ალე! – ესეც პირველი ტიტული!

პირველი და იმედია არა უკანასკნელი, ამ სეზონში კიდევ ერთი მიზანი გვაქვს დასახული და სულ რაღაც ერთი ხელის გაწვდენაზე ვართ ლა ლიგის ჩემპიონობასთან, მართალია სხვასაც აქვს ხელი გამოშვერილი, მაგრამ მოვიფიქრებთ რამეს, წინ კიდევ საკმარისი დროა.

რონალდ კუმანმა კიკე სეტიენს უკვე აჯობა, ტატა მატინოსაც აჯობა, რომელსაც ბევრად უკეთესი შემადგენლობა ჰყავდა, მაგრამ ყველაფერი წააგო, ჰოლანდიელი მწვრთნელი ჯერჯერობით სადღაც გასაყარზეა, წარმატებულ და წარუმატებელ მწვრთნელებს შორის, დროს თუ მისცემენ ორივე გზით შეიძლება, რომ მისი კარიერა წარიმართოს, ეს ბევრ რამეზე იქნება დამოკიდებული.

სრული დომინაცია

პირველი ტაიმი 0:0 დასრულდა, მაგრამ კოლოსალური უპირატესობა გვქონდა, უბრალოდ გოლში არ ასახულა, მთელი ტაიმის განმავლობაში, ბურთს მეტოქის ნახევარზე, კარის სიახლოვეს ვაკონტროლებდით, რაც ძალიან დიდი ხანია არ გვინახავს, მომენტებიც შეიქმნა, კარგი კომბინაციებიც ვიხილეთ, მაგრამ გოლი არ გასულა, როგორც წესი, მეტოქის მეკარის დამსახურებით.

„ბარსა“ მთელი გუნდით „ბილბაოს“ ნახევარზე იყო, უკანასკნელ მცველად ჟერარ პიკე რჩებოდა და იმ ერთადერთ შემტევს დაჰყვებოდა, ბასკების მხრიდან, რომ ჩვენს ნახევარზე რჩებოდა, ჟერარ პიკემ ინიაკი უილიამსი შეჭამა! დასწრებაზეც, ორთაბრძოლებშიც, საერთოდ ერთი შანსიც არ მიუცია, ინიაკიმ ერთადერთი ის შეძლო, რომ კარის გასწვრივ ჩააწოდა, თუმცა, ვის ჩაუწოდა?

უკვე მივეჩვიეთ მინგესას კარგ თამაშს და არც ლანგლეს გაუფუჭებია რამე. აი ფლანგებზე დიდი სხვაობა იყო, არა იმიტომ, რომ დესტმა შეხვედრა ჩააგდო, არამედ იმიტომ, რომ ალბა იყო ძალიან კარგი, გააჩნია დარჩენილ ტურებს როგორ ჩაატარებს და შეიძლება ითქვას, რომ ამ სეზონის ერთ-ერთი საუკეთესო ფეხბურთელია.

სეზონის წინ კუმანმა ულტიმატუმი წაუყენა, ან შენს საუკეთესო ვარიანტს ვიხილავთ, ან მოგიწევს გუნდიდან წასვლაო, ჰოდა, როგორც ჩანს დარჩენა ძალიან უნდა.

ტრიო

ნახევარდაცვის სამეული კარგ ფორმას დაუბრინდა, ისევ მაღალ ტემპში, ისევ მაღალი სიზუსტით, მეტი კრეატივით, დრიბლინგებით და ბურთის კონტროლით, დე იონგმა კიდევ ერთხელ გვანახა, რომ წინ უფრო დიდი სარგებელი მოაქვს ვიდრე დაცვაში.

გრიზმანს გაატანინა, მერე თავადაც შეაგდო ალბას ძალიან კარგი პასის შემდეგ და ბოლოს მესის წაეხმარა შედევრის შექმნაში, ძალიან დროული პასი მისცა, თანაც ძალიან ლამაზად გააკეთა ეს ყველაფერი.

ალბასი არ იყოს, ეს სეზონი დე იონგსაც ძალიან კარგი აქვს, ბევრად კარგი, ვიდრე წინა. სეზონის დასრულების შემდეგ შეფასების დროც მოვა, არაფერში დავზოგავთ და არაფერს დავუკარგავთ.

ვერ ვიტყვით, რომ ბუსკეტსს და პედრის საუკეთესო მატჩები ჰქონდათ, მაგრამ ის, რომ უდიდესი უპირატესობით ვფლობდით ბურთს, ეს მათი დიდი დამსახურება იყო.

ეს მინგესას, დესტის, არაუხოს, პედრის, დე იონგის, გრიზმანისა და მორიბას პირველი ტიტულია „ბარსელონაში“! ანტუანის რა მოგახსენოთ, მაგრამ დანარჩენები მხოლოდ ახლა იწყებენ.

პირველი იყო ბრეითუეიტისთვისაც, მცირე დრო დაეთმო, ირბინა ჩვეულად, ალბათ მალე დაგვტოვებს, კარგია, რომ მედალს წაიყოლებს.

მესი და გრიზმანი

ლეოს პირველ ტაიმშიც ჰქონდა კარგი მომენტები, ერთხელ დე იონგს დაარტყმევინა და ბურთი ძელს მოხვდა, მეორედ თავად დაარტყა და თითქოს შორეულ კუთხეში უნდა შეგორებულიყო, მაგრამ დაუფარეს.

ფეხებში ბევრი ურტყეს, ბევრიც იჯუჯღუნა, მაგრამ მეორე ტაიმში ხასიათზე მოვიდა და დახატა!

მესამე გოლის დროს ფლანგზე შეტევა, რომ წამოიწყო ის გოლი გამახსენდა 2015 წელს, თასის ფინალში, რომ „ბილბაოს“ შეუგდო, ზუსტად ასევე მოიხვია მცველები, ოღონდ ამჯერად დე იონგი დაიხმარა, ბოლოს თითქოს წონასწორობა უნდა დაეკარგა, მაგრამ ეს მხოლოდ ცრუ მოძრაობა ყოფილა, მცველი გააბითურა და ცივსისხლიანად შეაგორა კარში.

მეფეა!

ასწია კიდევ ერთი თასი და იმედია მეორესაც მიაყოლებს.

პირველი თასი აღმართა კაპიტნის რანგში, თამაშის ბოლოს ამ ემოციაზეც ისაუბრა, იქნებ მისთვის ახალ მოტივაციადაც იქცეს?!

გრიზმანმა პირველ ტაიმში გვანერვიულა, მაგრამ თავის საქმე გააკეთა, დემბელე ცოტა ფეხმა შეაწუხა და გრიზმანის თამაში გადაწყდა, არ ვიცი რა იქნება დარჩენილ ტურებში, მაგრამ დე იონგის დაცვაში თამაში აღარ შეიძლება, ეს უკვე დანაშაულია, ასე რომ მოუწევთ ფრანგებს ერთმანეთთან კონკურენცია.

რაღა დაგვრჩა..

„რეალს“ ძალიან რთული მატჩი აქვს „ხეტაფესთან“, ფაქტობრივად განახევრებული შემადგენლობით ჩადის სათამაშოთ და საერთოდ არ იქნება მოულოდნელი ქულები, რომ დაკარგონ, თუ იმასაც გავითვალისწინებთ, რომ „ჩელსისთან“ აქვთ საჭიდაო, საჩემპიონო შანსი ნამდვილად არ დაგვიკარგავს.

რონალდ კუმანმა კი ერთი ქულა ჩაიწერა აქტივში, დარჩენაზე, რომ გამოთქვამს პრეტენზიებს, მიზეზად და არგუმენტადაც მოიშველიებს.

აბა, მომილოცავს, წინ გამარჯვებები გველის!