მატჩისშემდგომი მიმოხილვა: ძველი დიდების გზაზე

 6:1!

„სოსიედადთან“, გასვლაზე!

„ბარსა“ დაბრუნდა, თან დაბრუნდა ლამაზად.

მთელმა გუნდმა ძალიან მაღალ დონეზე ითამაშა, ასეთ დროს კი მწვრთნელს აქებენ ხოლმე, სამართლაიანადაც, კუმანის ტაქტიკამ პირველ ეტაპზე გაამართლა, ახლა კი იხვეწება და ვითარდება. 

ერთადერთი რამაც ხასიათი გამიფუჭა, ხოსელუს გაფუჭებული თერთმეტმეტრიანი იყო, ჩვენი თამაშის წინ, „ატლეტიკომ“ იწვალა და სუარესის ხარჯზე მოიგო, ჯერჯერობით ჰყოფნით მისი კლასი მოსაგებად, სანაკრებო პაუზამაც სულზე მოუსწროთ, თუმცა, მაინც ვერ ტოვებენ ისეთ შთაბეჭდილებას, მთელი ჩემპიონატი, რომ დამაჯერებლად და უდანაკარგოთ გაიარონ, როგორც აღგვინიშნავს, მდევრის როლში ყოფნა, ფსიქოლოგიურად ბევრად უკეთესია.

ხოსელუს მატჩის მიწურულს შეეძლო პენალტის გატანა, შეხვედრა ფრედ დასრულდებოდა და „ატლეტიკოსთან“ სხვაობა კიდევ უფრო მეტად შემცირდებოდა, მაგრამ არ მოხდა ისე, როგორც გვსურდა, დასანანია.

ერთი რამ მაფიქრებს, როგორც წესი, ასე ბოლო წამს წაღებული ქულებით ჩემპიონატს იგებენ ხოლმე, თან სუარესიც ძალიან მოწადინებულია, მაგრამ ბევრი ტურია დარჩენილი, ჩვენზე კარგ ფორმაში არც „რეალია“ და არც „ატლეტიკო“, განწყობა კი მშვენიერია, ბოლოს და ბოლოს, ამდენი წლის მერე, კლუბს პრეზიდენტი ჰყავს.

მიეცი ნიჭსა გზა ფართო!

ჯერ კიდევ თინეიჯერები „ბარსელონაში“ დაფრინავენ, ამჯერად სერჟინიო დესტის ჯერი ყოფილა, საუკეთესო მატჩი ჩაატარა, ამ ბიჭმა სამომავლოდ მაგარი ამბები უნდა დაატრიალოს, კოჭებში ეტყობა!

ჯერ მარტო ის ფინტი რად ღირდა, ორ მცველს, რომ დაუსხლტა?! რატომღაც ჯარიმა არ მოგვცეს, მაგრამ ერთ რამედ ღირდა, სხვათა შორის, სერჟინიო დესტს ასეთი ფინტები სჩვევია, მოულოდნელი გადაწყვეტილებებიც მიუღია და როგორც აღმოჩნდა, დამაგვირგვინებელ ფაზაშიც მშვენიერია.

დაცვაში თამაშს მოუმატებს, სხვა გზა არ აქვს, უნდა მოუმატოს, როცა ამხელა პოტენციალი აქვს, ერთი წამით კითხვა არ უნდა გააჩინოს, რომ მისი ნდობა ღირს, შევადაროთ ახლა გუშინდელი დესტი, პირველი წრის დესტს – რადიკალური სხვაობაა! ძალიან გაზრდილია და შედეგზეც აისახა.

საოცარი თაობაა, სხვა რა უნდა ვთქვა?! დე იონგი ისე დამაჯერებლად თამაშობს დაცვაში, მართლა ნესტა გეგონება, პირველ წრეში ამაზე ვხუმრობდი, ახლა ეტყობა, რომ მთლიანად მოირგო ეს როლი, უკვე საერთოდ აღარ აინტერესებს რა პოზიციაზე თამაშობს, თავი ნაპოვნი ყავს, თავისივე როლი ბოლომდე აქვს გათავისებული და სადაც არ უნდა დააყენო სიამოვნებით თამაშობს.

აღვნიშნავ მინგესას, დიდად არ ჩანდა, მაგრამ ტაქტიკური გადანაცვლების დროს, სერხიო ბუსკეტსთან, ძალიან დროულად და უშეცდომოდ მოქმედებდა, ამას ვიდეოანალიზისას მივუბრუნდებით, ნამდვილად კარგი სანახავი იქნება.

ძალიან მაგარი თამაში ჰქონდა ალბას, საერთოდ, სეზონში ერთ-ერთი საუკეთესოა და მისი მნიშვნელობა გუნდში აშკარად გაიზარდა, ცუდია, რომ ისიც თინეიჯერი არ არის.

ლანგლეც კარგი იყო, არაფერი გაუფუჭებია. აი ასე, დაცვის ხაზმა თითქმის იდეალურად ითამაშა, შტეგენმა 1-2 შეცდომა დაუშვა და თავადვე გამოასწორა, გოლის დროს კი ვერაფერს იზამდა, ალბათ არც უნდა ექნა, პრესტიჟის გოლი თუ გადის, ეგეთი სილამაზის უნდა გავიდეს.

ბუსკეტსი-პედრი

ტრიო დუეტად დაიშალა, მაგრამ ცენტრში ბურთის აღებას მაინც ვახერხებთ, მესის უკან ჩამოსვლით და შეტევის ორგანიზებაში ჩართვით, გუშინ ყველა ფეხბურთელს კარგი თამაშის ჰქონდა, ზოგს მეტად, ზოგს ნაკლებად, მაგრამ ყველა კარგი იყო, იშვიათი ამბავია, განსაკუთრებით ამ სეზონში.

ბუსკეტსიც გადასარევი იყო, როგორც დაცვით, ისე შემტევ ფაზაში, მისი ორი პასი ვიდეოანალიზისთვის გამოგვადგება, კონტრშეტევის ჩაშლა და მინგესასთან პოზიციების ცვლა დაცვით მხარეზე გაგვაკეთებინებს აქცენტს, მცირე ხნით, ძველი ბუსკეტსი გამახსენდა, ალბათ იმიტომ, რომ „ბარსა“ ჰგავდა, ძველ „ბარსას“.

მორიბაც და პუჩიც კარგად შემოვიდნენ, რიკიმ ბოლო გოლში მიიღო მონაწილეობა, სწრაფი და ლამაზი კომბინაცია გათამაშდა, სჭირდება იმის განცდა, რომ ჯერ კიდევ გუნდის ნაწილია, თუმცა, საქმე ისე მიდის, რომ კუმანი დარჩენას აპირებს, რიკის საქმე კი ვერ იქნება კარგად.

ფრანგები

ლანგლეზე ვთქვი, კარგი თამაში ჰქონდა-მეთქი და არც თავდამსხმელები ჩამორჩნენ, კარგ ხასიათზე წავიდნენ საფრანგეთში, ორივემ გაიტანა, „დამბო“ უფრო აქტიური იყო, როგორც ბოლო თამაშებში ხდება, რამდენჯერმე აიბლანდა, მაგრამ ორი კარგი გოლი შეაგდო, ერთი მარჯვენათი, მეორე მარცხენათი, იდენტური დარტყმებით, ოღონდ ერთი არ ჩათვალეს, ჩემი წარმოდგენით კი უნდა ჩაეთვალათ, ამ პოზიციის გამო, ბევრი მეწინააღმდეგება, მაგრამ დღემდე მგონია, რომ ფეხთან გავლებული ხაზი აბსოლუტურად საკმარისია, ხელის ფრჩხილებისა და გრძელი თითების გათვალისწინება ცოტა სისულელე მგონია, მაგრამ VAR-მა თავის საქმე თვითონ იცის.

მესი

რეკორდი ჯიბეში აქვს, ალბათ მორიგი პიჩიჩიც, სანაკრებო პაუზა მას არ შეეხება, რადგან სამხრეთ ამერიკაში მატჩები არ ჩატარდება, შესაბამისად კარგად დაისვენებს. ამ სეზონში პირველად მოხდა, რომ გუნდმა მთელი კვირა დაისვენა, ლიგიდან გამოვარდნამ ეს პლუსი მოგვცა, ჰოდა, როგორ აისახა თამაშზე კი ვნახეთ, თავად მესიზეც, რა თქმა უნდა, დასვენება მისთვის ძალიან მნიშვნელოვანია.

სეზონის ბოლომდე, მეტი თავისუფალი დრო გვექნება, ამიტომ მთელი ძალებით შევუტევთ მეტოქეებს, თითქოს ყველაფერი მზად არის იმისათვის, რომ ლა ლიგის ტიტული დავიბრუნოთ!

ახლა მთავარი საზრუნავი ის არის, რომ ნაკრებიდან ჯანმრთელი ფეხბურთელები დაგვიბრუნდნენ, იმედია პედრი კანკავასთან სოციალურ დისტანციას დაიცავს, თორემ ირტყმეინება ჩვენი კაპიტანი.

ასეა, თბილისშიც ვნახავთ, ზოგი უკვე ნანახი გვყავს, ზოგსაც მალე ვნახავთ.

იმედია დაღვრემილებს გავუშვებთ და იყარონ მერე ჯავრი ვიზეც უნდათ.

მესი კი ამ დროს ძალებს აღიდგენს, წინ დიდი მატჩები გველის!