ვის შეიწირავს ახალი ტაქტიკა?

სულ ახალი პრობლემა, რომელიც მცირე ხნის წინ წარმოიშვა, ჯერ არც ისე შემაწუხებელია, უფრო სწორად კი საერთოდ არ არის შემაწუხებელი, იმიტომ, რომ დემბელე ჯერ არ დაბრუნებულა.

ერთი პრობლემის მოგვარებამ, მეორე წარმოშვა. გრიზმანს სწორი ადგილი გამოუნახეს მოედანზე და ამან გაამართლა, მოუთმენლად ველით მომდევნო მატჩს, იმის გასაგებად, რომ “ვილიარეალთან” შეხვედრა გამონაკლისი არ ყოფილა და გვინდა დავრწმუნდეთ იმაში, რომ ყველაფერი დალაგდა.

მეტოქე იდეალური გვყავს “ესპანიოლის” სახით, “ბარსას” თანაქალაქელებს ლამაზი თამაშით, გზა დაულოცონ მეორე ლიგისკენ. თამაში “კამპ ნოუზე” შედგება, მართალია ტრიბუნები ცარიელია, მაგრამ სახლი მაინც სახლია.

გრიზმანი და დემბელე

ლა ლიგაში მარცხს თითქოს უკვე შევეგუეთ, არა იმიტომ, რომ ჩვენი კლუბის არ გვჯერა, უბრალოდ “რეალს” მარტივი კალენდარი აქვს და ძალიან რთულად სავარაუდოა, რომ ტიტული ხელიდან გაუშვან. ამიტომ ფიქრი უკვე ჩემპიონთა ლიგისკენ არის მიმართული, რომელიც აგვისტოში განახლდება და უკვე გრიზმანის იმედიც მოგვეცა, თან დემბელეს დაბრუნებასაც ვვარაუდობთ, მიუხედავად ექიმების გაფრთხილებისა, რომ “ნაპოლისთან” შეხვედრისთვის მზად ვერ იქნება, მაინც.. ვინ იცის რა ხდება?!

პრობლემაც სწორედ აქ იჩენს თავს, გუნდი ყოველ მომდევნო თამაშში ტაქტიკას ვერ შეცვლის, რადგან ფეხბურთელებს ყველა ტაქტიკასთან ადაპტაცია სჭირდებათ, რაც შეიძლება მეტი უნდა ითამაშონ ერთი კონკრეტული სქემით, რომ თამაში გაუმჯობესდეს, გრიზმანის მოედანზე ყოფნის და დემბელეს დაბრუნების შემთხვევაში კი მთავარი კონფლიქტი იხატება.

დემბელე გარემარბია, ვალვერდემ რიგ შემთხვევებში მარჯვენა და მარცხენა ნახევარმცველადაც ათამაშა, მაგრამ 4-3-1-2-ში მისი ადგილი არსად არ არის. დემბელე არ არის ფორვარდი და მით უმეტეს, არც გამთამაშებელი. რომც იყოს, აბა მესის როგორ გაუწევს კონკურენციას?!

დემბელე ფლანგზე სათამაშოდ არის დაბადებული, ეს არის ადგილი, სადაც თავს კარგად გრძნობს და ეს არის ადგილი, სადაც გრიზმანს არაფერი გამოსდის.

ამიტომ სეზონის მიწურულს არჩევანის გაკეთება იქნება საჭირო, რომელიმე ფრანგი აუცილებლად უნდა წავიდეს, დარჩენის შანსი, რა თქმა უნდა, გრიზმანს გაცილებით დიდი აქვს.

შეუძლებელია, ყველა ცვლილების დროს ტაქტიკაც შეცვალო და გუნდი მთლიანად გადააწყო, უფრო სწორად, შესაძლებელია, მაგრამ ამას სარგებელი არასდროს მოაქვს.

ლაუტარო

ახლოვდება დღე, როცა ლაუტაროს კონტრაქტში მითითებული 111 მილიონი ევრო, ძალას დაკარგავს, მისი ფასი დაიწევს და “ინტერიც” იძულებული იქნება რომელიმე შეთავაზებას დათანხმდეს, სავარაუდოდ ვიდალს და რაკიტიჩს ისევ შესთავაზებენ, გარკვეულ თანხასთან ერთად.

ლაუტაროსთვის 4-3-1-2 გაცილებით მისაღები სქემაა, რადგან უფრო დიდი შანსი ექნება ძირითადში მოხვედრის, 4-3-3-ის დროს თუ მხოლოდ ერთი ადგილისთვის მოუწევს სუარესთან კონკურენცია, ამ შემთხვევაში ორი პოზიცია იქნება შესავსები, სამი ამხელა დონის ფორვარდის კონკურენცია კი მუდმივად ფორმაში ყოფნის გარანტიას იძლევა.

თუმცა, ეს ყველაფერი ძალიან ნაადრევი ფიქრია, რადგან ჯერ ისიც კი არ ვიცით, ვინ იქნება “ბარსას” მომავალი მწვრთნელი.