ბარსელონა ნიუკასლთან მატჩში ინკლუზიურ შრიფტს გამოიყენებს

ოთხშაბათს, ჩემპიონთა ლიგაზე “ნიუკასლის” წინააღმდეგ გასამართ მატჩში “ბარსელონას” ფეხბურთელების მაისურებზე მოთამაშეთა ნომრები განსაკუთრებული, ინკლუზიური შრიფტით იქნება დატანილი. ეს შრიფტი შექმნილია ანა ვივესის მიერ – ახალგაზრდა ქალის, რომელსაც დაუნის სინდრომი აქვს. 

ინიციატივა ორგანიზებულია “ბარსელონას” ფონდის მიერ, UEFA Foundation for Children-ისა და Itinerarium Foundation-ის თანამშრომლობით. კამპანია დაკავშირებულია დაუნის სინდრომის საერთაშორისო დღესთან, რომელიც ყოველწლიურად 21 მარტს აღინიშნება.

ეს იქნება პირველი შემთხვევა, როდესაც აღნიშნული ინკლუზიური შრიფტი ჩემპიონთა ლიგის ოფიციალურ მატჩში გამოიყენება. თუმცა “ბარსელონას” ისტორიაში მსგავსი ინიციატივა უკვე ყოფილა – 2013 წელს, ჟოან გამპერის თასზე “სანტოსის” წინააღმდეგ მატჩში. იმ შეხვედრაში ანდრეს ინიესტას მაისური, რომელიც ამ შრიფტით იყო გაფორმებული, დღეს “ბარსელონას” მუზეუმში ინახება.

ინიციატივის მიზანი არის საზოგადოებაში ცნობიერების ამაღლება და ინტელექტუალური შეზღუდვის მქონე ადამიანების ხილვადობისა და სოციალური ინკლუზიის მხარდაჭერა.