ტერ შტეგენი დარწმუნებულია, რომ კლუბი მისი რეპუტაციის შესალახად კამპანიას აწარმოებს

გუშინ ბარსელონამ მარკ-ანდრე ტერ შტეგენს კაპიტნის სამკლავური ჩამოართვა, რადგან ის კლუბს პრობლემებს უქმნის.

SER-ის ინფორმაციით, თავის მხრივ, გერმანელი ბარსათი უმაყოფილია – იგი მიიჩნევს, რომ ჟოან ლაპორტა სათანადოდ არ ექცევა და მასთან კომუნიკაბელური არაა. ტერ შტეგენი ფიქრობს, საჯარო განცხადება გააკეთოს თუ არა, რადგან სჯერა, რომ ქომაგების თვალში მისი იმიჯი არასამართლიანად დაზიანდა.

წყაროს ცნობით, გერმანელი მეკარე გუნდში ჟოან გარსიას მოსვლით ძალიან გაბრაზებულია, მაგრამ მზადაა, ეს გამოწვევა მიიღოს და მას კონკურენცია გაუწიოს. მარკს მიაჩნია, რომ გარსია კარგი მეკარეა, ამასთან, ვოიცეხ შესნისთან და სხვა თანაგუნდელებთანაც კარგ ურთიერთობას ინარჩუნებს. ამჟამად ის რეაბილიტაციის პროცესს გადის და დაბრუნების შემდეგ სასტარტო შემადგენლობისთვის ბრძოლა სურს.

ტერ შტეგენმა ცოტა ხნის წინ ოპერაცია ექიმ ამელი ლეგლიზთან გაიკეთა, ისევე, როგორც 2023 წელს – მაშინ გერმანელი მოედანს 2 თვეში დაუბრუნდა. იმ წელს, ამავე ექიმმა ქირურგიული ჩარევა მარკოს ალონსოსაც ჩაუტარა და ფეხბურთელს გამოსაჯანმრთელებლად 8-10 კვირა დასჭირდა. მიუხედავად ამისა, ბარსა ამტკიცებს, რომ ეს რეციდივია და რებილიტაციას 4-5 თვე სჭირდება.

ტერ შტეგენი დარწმუნებულია, რომ კლუბი მისი რეპუტაციის შესალახად კამპანიას აწარმოებს. მარკი ამბობს, რომ ბარსელონას მისთვის გუნდის გეგმებზე არაფერი უთქვამს და იმასაც უარყოფს, რომ “მონჟუიკზე” ფანებისთვის მიმართვაზე უარი თქვა.

გერმანელი სამედიცინო ანგარიშს, რომ რებილიტაციისთვის 4 თვე დასჭირდება, ხელს არ აწერს – კლუბს ეს დოკუმენტი ლა ლიგისთვის გადასაგზავნად სჭირდება, რათა მისი ხელფასის 80%-ით სხვა ფეხბურთელი დაარეგისტრიროს.