რაიო-ბარსელონა | მიმოხილვა [VIDEO]

“ბარსელონა” ლა ლიგის 31-ე ტურში “ვალეკასზე” “რაიო ვალიეკანოსთან” 1-2 დამარცხდა. კატალონიურმა გრანდმა “რაიოს” ზედიზედ მე-4 თამაში ვერ მოუგო.

მატჩი მასპინძლების უპირატესობით დაიწყო და სახიფათო მომენტებსაც სწორედ ისინი ქმნიდნენ. მე-19 წუთზე კი ალვარო გარსიამ ლამაზი დარტყმით ანგარიშის გახსნაც მოახერხა. “ბარსელონამ” პირველი ტაიმის ბოლოს გოლის გატანაც მოახერხა, თუმცა რობერტ ლევანდოვსკი მეტოქეზე ოდნავ წინ აღმოჩნდა და მსაჯმა თამაშგარე დააფიქსირა.

მეორე ტაიმი პირველის მსგავსად წარიმართა და ლოგიკური შედეგითაც გაგრძელდა 53-ე წუთზე ნახევარდაცვის შეცდომით ფრან გარსიამ ისარგებლა და ტერ შტეგენის წინ პირისპირ დარჩენილმა სხვაობა 2-ბურთიანი გახადა. “ბარსამ” სახიფათო მომენტების შექმნა ვერც ამის შემდეგ შეძლო და მხოლოდ 83-ე წუთზე რობერტ ლევანდოვსკიმ მოახერხა ერთი გოლის გატანა, თუმცა ანგარიშის გათანაბრების რეალური შანსი გუნდს აღარ ჰქონია. 

საბოლოოდ, “ბლაუგრანა” დამარცხდა, თუმცა მიმდინარე ტურში “რეალ მადრიდის” წაგების გამო, მეორეადგილოსანთან სხვაობა 11 ქულა დარჩა და “ბარსა” ჩემპიონობას კიდევ უფრო მიუახლოვდა.