“ბარსას” აღმასრულებელი დირექტორი ფერან რევერტერი გახდება

RAC1-თან ინტერვიუში, “ბარსელონას” 42-ე პრეზიდენტმა, ჟოან ლაპორტამ, დირექტორთა საბჭოს რამდენიმე წევრი დაასახელა.

აღმასრულებელი დირექტორის პოსტზე, ოსკარ გრაუს ფერან რევერტერი შეცვლის, რომელიც აქამდე გერმანული კომპანია MediaMarktSaturn-ის აღმასრულებელი დირექტორი გახლდათ.

RAC1-ის მიერ გავრცელებული ინფორმაციის თანახმად, ოთხშაბათს, ჩინეთიდან ბარსელონაში ჟორდი კრუიფი ჩამოვა, რომელიც სპორტული დირექტორის თანამდებობას დაიკავებს. ვიცე-პრეზიდენტი ეკონომიკური მიმართულებით ჟაუმე ჟირო გახდება. ლაპორტას გუნდს “მალიორკას” ყოფილი პრეზიდენტი და “ვალენსიას” ყოფილი აღმასრულებელი დირექტორი, მატეუ ალემანიც, შეუერთდება.

ასევე, ვიცე-პრეზიდენტის პოსტს მარია ელენა ფორტი დაიკავებს. ლაპორტას მარჯვენა ხელი, რაფა იუსტე, კი დირექტორთა საბჭოს წევრი გახდება, რომელიც კლუბის სპორტული მიმართულების ერთ-ერთი ხელმძღვანელი იქნება.