“ბეტისს” მინგესას უფასოდ დამატება უნდა

ანდალუსიური Muchodeporte-ს ინფორმაციით სევილიური “ბეტისი” “ბარსელონას” ახალგაზრდა მცველის, ოსკარ მინგესას სამსახურით დაინტერესდა.

21 წლის უკანახაზელი ჯერ კიდევ “ბარსა ბ-შია” დარეგისტრირებული, მაგრამ ის მუდმივად პირველ გუნდთან ერთად ვარჯიშობს და ხშირადაც თამაშობს. ახალგაზრდა ფეხბურთელს მიმდინარე სეზონში უკვე 25 თამაში დაუგროვდა, საიდანაც 18 მან სასტარტო შემადგენლობაში დაიწყო. შესანიშნავი შედეგია იმ ფეხბურთლისთვის, რომელსაც, სეზონის სტარტზე, პირველ გუნდში დაწინაურებას არავინ უწინასწარმეტყველებდა. განსაკუთრებით აღსანიშნავია ის ფაქტი, რომ მინგესა დაცვის ცენტრშიც და მარჯვენა ფლანგზეც აშკარად უკეთ გამოიყურება იმ ფეხბურთელებთან შედარებით, რომლების იმედიც “ბარსას” ამ პოზიციაზე სეზონის სტარტზე ჰქონდა – კლემან ლანგლე და სერჟინიო დესტი.

მინგესას “ბარსელონასთან” კონტრაქტი მიმდინარე სეზონის ბოლოს უმთავრდება, მაგრამ კლუბს ხელშეკრულების 2 წლით გახანგრძლივების უფლება აქვს. ძნელი წარმოსადგენია “ბლაუგრანამ” ეს უფლება არ გამოიყენოს იმ ფეხბურთელთან მიმართებაში, რომლის ფასიც ბოლო 5 თვის განმავლობაში 25-ჯერ გაიზარდა.

მოვლენებს ყურადღებით აკვირდება “ბეტისი”, რომელსაც, Muchodeporte-ს ცნობით, მინგესას უფასოდ დამატების იმედი აქვს.

მომდევნო სეზონში “ბარსას” დაცვის ცენტრში იქნებიან ჟერარ პიკე, რონალდ არაუხო და ერიკ გარსია. უმტიტი გუნდს აუცილებლად დატოვებს. არაა გამორიცხული, მის გზას დაადგეს ლანგლეც. ასეთ შემთხვევაში “ბარსას” კიდევ ერთი ცენტრალური მცველი დაჭირდება და რატომ არ შეიძლება ეს ოსკარ მინგესა იყოს?