„ბარსელონა“ პამპლონაში ჩავიდა

პარასკევს, “სიუტატ ესპორტივა ჟოან გამპერზე” გამართული ვარჯიშის შემდეგ, “ბარსელონა” პამპლონას ეწვია. როგორც იცით, ლა ლიგაში აღზევებულ “ოსასუნასთან” შეხვედრისთვის ერნესტო ვალვერდემ 18-კაციანი განაცხადი დაასახელა.

ანსუ ფატისა და კარლეს პერესს შეუფასებელი გამოცდილების მიღების შანსი კვლავ ექნებათ. ლაზარეთში იმყოფებიან ლიონელ მესი, ლუის სუარესი, უსმან დემბელე და ნეტუ.

“ელ სადარზე” “ბარსელონა” ლა ლიგის მიმდინარე გათამაშებაში მეორე გამარჯვების მოპოვებას შეეცდება. გახსნით შეხვედრაში “ბლაუგრანა” “ბილბაოსთან” დამარცხდა (0:1), ხოლო “ბეტისთან” მატჩი კატალონიელებისთვის ტრიუმფალური აღმოჩნდა (5:2).