რაფინია ევროპაში საუკეთესოა

რაფინიას ისტორიულ მიღწევასთან სულ ცოტა დააკლდა. “ბარსელონას” ისტორიაში ლა ლიგის საწყის ხუთ ტურში გოლის გატანა მხოლოდ სესარ როდრიგესმა (1950/51) და ზლატან იბრაჰიმოვიჩმა (2009/10) შეძლეს – მიღწევა, რომელიც სეზონის სტარტზე ლეო მესისაც კი არ ჰქონია (თუმცა არგენტინელს 2012/13 წლების სეზონში ზედიზედ 19 ტურში გატანის აბსოლუტური რეკორდი ეკუთვნის). ბრაზილიელმა “ლევანტესთან” შეხვედრაში (4-2) კარის აღება ვერ მოახერხა და ვერც სესარის 9 და ვერც შვედი ფორვარდის 6 გოლს ვერ გაუთანაბრდა, თუმცა ორი საგოლე გადაცემით მატჩის ბედის გადაწყვეტაში კვლავ დიდი წვლილი შეიტანა.

მე-5 წუთზე სწორედ რაფინიამ უპასა ჩავი ესპარტს ანგარიშის გასახსნელად. სულ რაღაც 14 წუთის შემდეგ მან კვლავ იპოვა სივრცე და ლამინ იამალს გაატანინა (0-2). ორი საგოლე გადაცემა 19 წუთში – ეს მკაფიო დემონსტრირებაა იმისა, თუ რამდენად დიდია მისი გავლენა “ბარსელონას” შეტევაზე.

მისი წვლილი მხოლოდ ასისტებით არ ამოწურულა: რაფინია მატჩში ყველაზე მეტი (3) საგოლე მომენტის შემქმნელი გახდა. მან ასევე სამი წარმატებული დრიბლინგი შეასრულა, რითაც გუნდში ლამინ იამალს გაუთანაბრდა. მატჩი მან ორი დარტყმით დაასრულა (ერთი ზუსტი), თუმცა მისი ლიდერობა მეტოქის საჯარიმოს გარშემო შექმნილი საფრთხეებით გაცილებით უკეთ აიხსნება, ვიდრე უბრალოდ დარტყმებით.

ევროპული მასშტაბი: შეუდარებელი პროდუქტიულობა

ლა ლიგის ხუთი ტურის შემდეგ რაფინიას აქტივში 6 გოლი და 3 საგოლე გადაცემაა. სხვა სიტყვებით, მან უშუალო მონაწილეობა მიიღო “ბარსელონას” მიერ ჩემპიონატში გატანილ 21 გოლიდან 9-ში. ეს მაჩვენებელი კიდევ უფრო შთამბეჭდავია, როდესაც მას ევროპის სხვა წამყვან ჩემპიონატებს ვადარებთ:

• პრემიერ ლიგა: ერლინგ ჰოლანდს (“მანჩესტერ სიტი”) 4 გოლი აქვს გატანილი და საგოლე გადაცემა ჯერ არ გაუკეთებია.
• სერია A: დონიელ მალენი (“რომა”) 5 გოლით ბომბარდირია, თუმცა ასისტი მის ანგარიშზეც არ ფიქსირდება.
• ლიგა 1: ამინ გუირი (“მარსელი”) – 4 გოლი (0 ასისტი); კამორი დუმბია (“ბრესტი”) – 4 გოლი და 1 ასისტი; ლასინ სინაიოკო (“პარიზი”) – 4 გოლი (0 ასისტი).
• ბუნდესლიგა: იგორ მატანოვიჩი (“ფრაიბურგი”) და პატრიკ შიკი (“ლევერკუზენი”) – 3-3 გოლი და 1-1 საგოლე გადაცემა.

ევროპის არცერთ წამყვან ლიგაში არ მოიძებნება მოთამაშე, რომელსაც გოლებისა და ასისტების ასეთი ჯამური პროდუქტიულობა ჰქონდეს.

“ბარსელონას” გამოკვეთილი შემტევი ლიდერი ჰყავს. სეზონის საერთო სტატისტიკა – 8 გოლი და 3 საგოლე გადაცემა ლა ლიგასა და ჩემპიონთა ლიგაზე – ადასტურებს მის სრულ დომინაციას. რაფინიამ ლა ლიგის ხუთივე შეხვედრა სასტარტო შემადგენლობაში დაიწყო (409 წუთი), ისევე როგორც ჩემპიონთა ლიგის პირველი ტურის მატჩი (71 წუთი). ის უბრალოდ ფორვარდი აღარ არის – რაფინია უნივერსალური შემტევი და გუნდის ნამდვილი კაპიტანია.