ლამინ იამალს ბარსელონაში 50 გოლი დაუგროვდა

ლამინ იამალი ისტორიის წერას განაგრძობს. “ბარსელონას” 10-იანმა მიმდინარე სეზონში პირველი გოლი გაიტანა და ეს არ იყო რიგითი ბურთი: ჯერ ერთი, შესრულების ოსტატობის გამო – უძლიერესი დარტყმა “რაიო ვალეკანოს” კარის უახლოეს ცხრიანში, მეორეც – ეს “ბარსელონას” პირველ გუნდში მისი რიგით 50-ე გოლი გამოდგა.

19 წელი და 49 დღე – საკლუბო რეკორდი

ესპანელმა ვუნდერკინდმა ამ ნიშნულს სულ რაღაც 19 წლისა და 49 დღის ასაკში მიაღწია, რითაც “ბარსელონას” ისტორიაში ყველაზე ახალგაზრდა ფეხბურთელი გახდა, რომელმაც 50-გოლიან ზღვარს მიაღწია.

თითქმის სამი წელი გავიდა იმ სადებიუტო გოლიდან, რომელმაც უკვე მიანიშნა, რომ რაღაც განსაკუთრებული იწყებოდა – ეს მოხდა 2023 წლის 8 ოქტომბერს, “გრანადასთან” გასვლით შეხვედრაში. იმ დარტყმით ის ლა ლიგის ისტორიაში ყველაზე ახალგაზრდა მეგოლე გახდა. მას შემდეგ მისი პროგრესი მეტეორივით სწრაფი იყო. მოზარდი, რომელიც მაშინ ელიტაში ადგილის დამკვიდრებას იწყებდა, დღეს “ბარსელონასა” და მსოფლიო ფეხბურთის მთავარ სახედ იქცა. 20 წლამდე ასაკში გატანილი 50 გოლი ის მაჩვენებელია, რომელიც ლამინს თანამედროვეობისა და ნებისმიერი ეპოქის ყველაზე არაჩვეულებრივ ახალგაზრდა მეგოლეთა შორის აყენებს.

მბაპესა და ჰოლანდის რეკორდების დამხობა

ევროპის ტოპ 5 ჩემპიონატში, ყველა ტურნირის გათვალისწინებით, ამ ასაკში 50-გოლიან ზღვარს მხოლოდ ორმა გამორჩეულმა ვარსკვლავმა მიაღწია, თუმცა ლამინ იამალმა ორივეს აჯობა:

• ლამინ იამალი: 19 წელი და 49 დღე
• კილიან მბაპე: 19 წელი და 241 დღე
• ერლინგ ჰოლანდი: 20 წელი და 196 დღე

ეს 50 გოლი ბევრად მეტია, ვიდრე უბრალოდ სტატისტიკა. ეს არის იმ მოთამაშის განვითარების ასახვა, რომელმაც “ბარსელონასთან” ერთად საკუთარი ისტორიის წერა გრანადაში დაიწყო და ახლა ახალ მწვერვალებს იპყრობს. წინ კი კიდევ უდიდესი გზაა.