ოფიციალურად: ექტორ ფორტი რეალ სოსიედადში გადავიდა

“ბარსელონამ” ექტორ ფორტის გუნდიდან წასვლა ოფიციალურად დაადასტურა. “ლა მასიას” აღზრდილმა, რომელმაც გასული სეზონი იჯარით “ელჩეში” გაატარა, არჩევანი “რეალ სოსიედადის” წინადადებაზე შეაჩერა.

ტრანსფერის ფინანსური დეტალები

ბასკური კლუბი ფეხბურთელის უფლებების 50%-ის სანაცვლოდ 8,5 მილიონ ევროს გადაიხდის. ფორტმა ახალ გუნდთან კონტრაქტი 2031 წლამდე გააფორმა.

ამასთან, “ბარსელონა” ინარჩუნებს:

• გამოსყიდვის უფლებას (Buy-back): 20 მილიონ ევროდ 2028 წლამდე, ხოლო 25 მილიონ ევროდ 2029 წლამდე.
• პროცენტს მომავალი გაყიდვიდან.

ფორტი კატალონიურ კლუბს 13-წლიანი ყოფნის შემდეგ ემშვიდობება.

კონკურენცია და ახალი გამოწვევა

წინასასეზონო მომზადების შემდეგ, ჰანსი ფლიკმა გუნდში ფორტისთვის ადგილი ვერ იპოვა, რადგან მარჯვენა მცველის პოზიციაზე ერიკ გარსიას, ჟიულ კუნდესა და ჩავი ესპარტის ვარიანტები აქვს. 20 წლის მცველს რამდენიმე შეთავაზება ჰქონდა. ერთ-ერთი მთავარი პრეტენდენტი “ბორუსია დორტმუნდი” იყო, თუმცა გერმანელებმა “ბარსელონას” მიერ მოთხოვნილი 15 მილიონი ევრო არ გადაიხადეს, რითაც “რეალ სოსიედადმა” ისარგებლა და მათ დაასწრო.

ფორტი სან სებასტიანში შაბათს დილით ჩაფრინდა, საღამოს კი თავისი ახალი გუნდის მატჩს “ესპანიოლის” წინააღმდეგ ტრიბუნიდან ადევნა თვალი. ბასკურ გუნდში მას ძირითადში ადგილისთვის ბრძოლა არამბურუსა და ოდრიოსოლასთან (რომელიც ხანგრძლივი ტრავმის გამო ლაზარეთშია) მოუწევს.

სპორტული ხელმძღვანელობის ახალი პოლიტიკა

“ბარსელონა” “ელჩეში” მის იჯარას ყურადღებით აკვირდებოდა. ედერ სარაბიას გუნდში მისი პროგრესი იმდენად დადებითი იყო, რომ კლუბში პირველ გუნდში მის დაბრუნებასაც განიხილავდნენ. თუმცა, ლა ლიგაში გატანილი სადებიუტო გოლის შემდეგ უიღბლო დაცემამ მხრის ოპერაცია და ხანგრძლივი უქმობა გამოიწვია (მან მხოლოდ სეზონის ბოლო ეტაპზე შეძლო დაბრუნება).

ფორტის ტრანსფერი სპორტული ხელმძღვანელობის ახალი სტრატეგიის შედეგია: როდესაც “ლა მასიას” აღზრდილებისთვის პირველ გუნდში ადგილი არ მოიძებნება, კლუბი მათ სანაცვლოდ ფინანსურ სარგებელს იღებს, პარალელურად კი მომავალი გაყიდვის პროცენტსა და გამოსყიდვის უფლებას იტოვებს. მსგავსი ფორმულით განხორციელდა ჟოფრე ტორენსის ტრანსფერი, უახლოეს პერიოდში ტონი ფერნანდესი “ვენეციაში” გადაბარგდება, ანალოგიურად კი გილე ფერნანდესის წასვლაც იგეგმება.