ხილ მარინი გასპარს ალვარესის ტრანსფერზე: დროს ნუ კარგავ!

“ბარსელონას” ყოფილმა პრეზიდენტმა, ჟოან გასპარმა გადაცემა Jijantes-ში არგენტინელი თავდამსხმელის, ხულიან ალვარესის მომავალზე ისაუბრა. მან “ატლეტიკოს” აღმასრულებელ დირექტორთან, მიგელ ანხელ ხილ მარინთან ორშაბათს შემდგარი მიმოწერის დეტალები გაასაჯაროვა და აღნიშნა, რომ მადრიდელთა ხელმძღვანელს კატალონიურ კლუბთან მოლაპარაკებების გამართვა კატეგორიულად არ სურს.

“ძვირფასო მეგობარო, პატივს გცემ. მესაუბრე რაზეც გინდა, მაგრამ ხულიანსა და ‘ბარსელონაზე’ დროს ნუ კარგავ,” – ასე უპასუხა ხილ მარინმა გასპარს.

ყოფილი პრეზიდენტის თქმით, ხილ მარინს არანაირ პირობებში არ სურს ალვარესის “ბარსელონაში” გაშვება. მისი აზრით, ეს არა ფულის, არამედ პირადი პრინციპის საკითხია. ჟოან ლაპორტამ ყველაფერი გააკეთა, თუმცა “ატლეტიკოს” მხრიდან მკაცრ წითელ ხაზს წააწყდა. მადრიდელები მზად არიან ფეხბურთელი ნებისმიერ სხვა კლუბში გაყიდონ, მაგრამ არა “ბარსელონაში”.

არანაირი შანსი და ფეხბურთელის ნება

ჟოან გასპარი პესიმისტურადაა განწყობილი და მიიჩნევს, რომ სატრანსფერო ფანჯრის ბოლო წუთებზეც კი შეთანხმების მიღწევა შეუძლებელია, მიუხედავად იმისა, რომ თავად ფეხბურთელმა კატალონიაში გადმოსასვლელად მაქსიმუმი გააკეთა.

მან ასევე გაიხსენა დიეგო მარადონას “ნაპოლიში” ტრანსფერი, როდესაც თავად “ბარსელონას” სპორტული მიმართულების ხელმძღვანელი იყო და არგენტინელის პირადი სურვილი დააკმაყოფილა. გასპარმა არსებულ სიტუაციასთან მკაცრი პარალელი გაავლო:

“მოთამაშის ნება უმნიშვნელოვანესი უნდა იყოს. მონობა წლების წინ გაუქმდა, მაგრამ ფეხბურთში ის ჯერ კიდევ არსებობს.”