ბარსელონას რჩეული სესკ ფაბრეგასია

სესკ ფაბრეგასი ნომერ პირველი კანდიდატია ჰანსი ფლიკის შესაცვლელად, როდესაც ეს უკანასკნელი “ბარსელონაში” თავის ეტაპს დაასრულებს. Catalunya Ràdio-ს პოდკასტ “Barça Reservat”-ის ინფორმაციით, იტალიური “კომოს” მთავარ მწვრთნელს გერმანელი სპეციალისტის შემცვლელად დეკუს ხელმძღვანელობით მოქმედი სპორტული კომისიის აბსოლუტური მხარდაჭერა აქვს.

მეტიც, კატალონიელები ყოფილ ფეხბურთელს უკვე დაუკავშირდნენ, რათა 2028 წლიდან შესაძლო ტრანსფერისთვის კარი ღია იყოს. სწორედ ამ დროს იწურება ფლიკის კონტრაქტი (თუმცა, მიზნების მიღწევის შემთხვევაში, მას კიდევ ერთი წლით გახანგრძლივების ვარიანტი აქვს). ასეა თუ ისე, კლუბის წინადადება სესკისადმი მდგომარეობს იმაში, რომ მან ნებისმიერ სამომავლო კონტრაქტში გაითვალისწინოს “ბარსელონაში” წამოსვლის პუნქტი.

“ბარსელონას” ინტერესი იმდენად რეალურია, რომ AS-ის ცნობით, რამდენიმე თვის წინ მათ “კომოში” წარმომადგენელიც კი გაგზავნეს წინადადების საბოლოოდ შესათანხმებლად. 2028 წლიდან სესკის “დაჯავშნა” ჟოან ლაპორტასა და დეკუს მარჯვენა ხელს, ალეხანდრო ეჩევარიას დაევალა.

სესკ ფაბრეგასის მოღვაწეობა მოკრძალებულ “კომოში” ყველას აოცებს. მან ახალაღზევებულ გუნდს განსაკუთრებული თამაში აჩვენებინა და მიმდინარე სეზონში ჩემპიონთა ლიგაზეც კი გაიყვანა.

ლუის ენრიკეს ვარიანტი გამორიცხულია

რაც შეეხება ლუის ენრიკეს, მიუხედავად პსჟ-ში ჩატარებული ფანტასტიკური სეზონისა, სადაც მან ჩემპიონთა ლიგის ტიტული კვლავ მოიპოვა, მისი კანდიდატურა გამორიცხულია. გარდა იმ დიდი ხელფასისა, რასაც ის პარიზულ კლუბში იღებს (და რასაც “ბარსელონა” ვერ გადაიხდის), მისი დაბრუნების მთავარი ხელშემშლელი ფაქტორი გასახდელის მართვის მისი სპეციფიკური სტილია – ის კრძალავს ნებისმიერ გარე ჩარევას და გუნდს მაქსიმალურად იზოლირებულს ხდის.

ამ კუთხით, ალეხანდრო ეჩევარიას მუშაობა პირველ გუნდში აშკარად შეიზღუდებოდა და მას გასახდელის დატოვება მოუწევდა, რადგან ლუჩოს სურს, რომ მასთან მხოლოდ მისი ვიწრო წრის ადამიანებმა იმუშაონ. ეს სიტუაცია კი დღესდღეობით არცერთ შემთხვევაში არ განიხილება, რადგან ჟოან ლაპორტას ყოფილი ცოლისძმა გასახდელის შიგნით მენეჯმენტისთვის სასიცოცხლოდ მნიშვნელოვან ფიგურად მიიჩნევა.