ერთი დღე “ბარსას” ისტორიაში – 12 ნოემბერი

წარმოგიდგენთ რუბრიკას “ერთი დღე “ბარსელონას” ისტორიაში”. ამჯერად შემოგთავაზებთ “ბარსელონასთან “დაკავშირებულ მოვლენებს, რომლებიც 12 ნოემბერს მოხდა.

თამაშები

12 ნოემბერს “ბარსელონამ” 12  ოფიციალური თამაში ჩაატარა, საიდანაც კატალონიელებმა 7 მოიგეს, 3 ფრედ დაასრულეს და 2 წააგეს.

1902 წელი

შეიქმნა ბარსელონის საფეხბურთო კლუბების ასოციაცია (Asociación de Clubs de Foot-ball de Barcelona), რომელიც მოგვიანებით კატალონიის ფეხბურთის ფედერაციად ჩამოყალიბდა. დამფუძნებელ ათ კლუბს შორის “ბარსელონაც” იყო. ორგანიზაციის შექმნა მნიშვნელოვანი ნაბიჯი აღმოჩნდა კატალონიაში საფეხბურთო შეჯიბრებების ერთიანი მართვისა და განვითარების გზაზე.

1912 წელი

ფედერაციასთან არსებული უთანხმოების გამო “ბარსელონამ” ორგანიზაციის დატოვების გადაწყვეტილება მიიღო. მანამდე, 7 ნოემბერს, კლუბში საგანგებო საერთო კრება გაიმართა, რომელზეც ფედერაციის მოქმედებები განიხილეს. საბოლოოდ, 12 ნოემბერს “ბარსელონა” ფედერაციიდან გავიდა. დაპირისპირებას დეკემბერში ალტერნატიული საფეხბურთო ორგანიზაციის ჩამოყალიბება მოჰყვა.

1933 წელი

“ლეს კორტსზე” გამართულ ბარსელონურ დერბიში “ბარსამ” “ესპანიოლი” 5-0 გაანადგურა. გოლები მორერამ (2), ვენტოლრამ, რამონმა და პერესმა (საკუთარ კარში) გაიტანეს.

1944 წელი

მადრიდში გამართული სეზონის პირველი “ელ კლასიკო” “ბარსელონამ” 0-1 წააგო.

1950 წელი

8-12 ნოემბერს “ბარსელონას” ისტორიაში პირველი რეფერენდუმი ჩატარდა. კლუბის წევრებს უნდა გადაეწყვიტათ, შეეძინა თუ არა “ბარსელონას” მიწის ნაკვეთი ახალი სტადიონის ასაშენებლად. პროექტს მხარი 7 835 წევრმა დაუჭირა, წინააღმდეგი კი 1 132 იყო. ორი დღის შემდეგ კლუბის საგანგებო ასამბლეამ მიწის შეძენა დაამტკიცა.

ამ გადაწყვეტილებამ მნიშვნელოვანი როლი ითამაშა “კამპ ნოუს” მშენებლობაში. სტადიონი 1957 წლის 24 სექტემბერს გაიხსნა.

1950 წელი

“ბარსელონას” ლეგენდარულმა თავდამსხმელმა სესარ როდრიგესმა ესპანეთის ჩემპიონატში კლუბის მაისურით მე-200 შეხვედრა ჩაატარა. “ბარსელონა” სტუმრად “სელტას” დაუპირისპირდა და 2-2 ითამაშა. კატალონიელთა გოლები ესტანისლაუ ბასორამ და ჟოზეპ სეგერმა გაიტანეს, ამ უკანასკნელმა პენალტით გამოიჩინა თავი.

1998 წელი

დაიბადა ჟიულ კუნდე.

2006 წელი

ლა ლიგის მეათე ტურში “ბარსელონამ” კამპ ნოუზე “სარაგოსა” 3-1 დაამარცხა. მასპინძელთაგან ორი გოლი რონალდინიომ გაიტანა, ერთი კი ხავიერ სავიოლამ. ამ გამარჯვებით ფრანკ რაიკარდის გუნდმა ჩემპიონატში პირველი ადგილი დაიბრუნა.

თუმცა შეხვედრას მძიმე ეპიზოდიც ახლდა. 19 წლის ლიონელ მესიმ პირველ ტაიმში ფეხი დაიზიანა და მოედანი დატოვა. მომდევნო დღეს დადასტურდა, რომ არგენტინელს მარცხენა ტერფის მეხუთე მეტატარსალური ძვალი ჰქონდა მოტეხილი. ექიმები თავდაპირველად დაახლოებით სამთვიან იძულებით პაუზას ვარაუდობდნენ.

2021 წელი

“ბარსელონამ” ოფიციალურად გამოაცხადა, რომ ბრაზილიელ მცველ დანი ალვესთან პრინციპულ შეთანხმებას მიაღწია. 38 წლის ფეხბურთელი კლუბში ხუთწლიანი განშორების შემდეგ ბრუნდებოდა.

ალვესი, რომელმაც 2008-2016 წლებში “ბარსელონასთან” ერთად 23 ტიტული მოიგო, ჩავის მწვრთნელობის პერიოდში პირველი ახალი შენაძენი გახდა. ფეხბურთელს ვარჯიშის განახლება ნოემბერში შეეძლო, ოფიციალურ მატჩებში მონაწილეობა კი მხოლოდ 2022 წლის იანვრიდან.