”ოსასუნასთან” გამართული მატჩი ტრავმების გარეშე არ დასრულდა. თავდაპირველად მატჩის მე-12 წუთზე ფონტასმა დატოვა მოედანი. როგორც შემდგომი გამოკვლევებიდან დადგინდა ფეხბურთელს მარჯვენა მუხლის ჯვარედინი მყესები აქვს გაწყვეტილი. უახლოეს დღეებში ფონტასს ოპერაცია ჩაუტარდება, რის შემდეგაც დადგინდება მისი დაბრუნების თარიღი. მიმდინარე სეზონში ანდრეუმ 5 შეხვედრაში მიიღო მონაწილეობა: ”ოსპიტალეტთან” ორივე მატჩში, ლიგაზე ”ბატესთან”, პრიმერაში ”სოსიედადთან” და გუშინდელ მატჩში.
მოგვიანებით, მატჩის 68-ე წუთზე პედრო როდრიგესმა შეცვლა ითხოვა. ფეხბურთელმა მარცხენა ბარძაყში დისკომფორტი იგრძნო. მისი დაბრუნების დრო ჯერ ცნობილი არ არის, თუმცა დარწმუნებით შეიძლება ითქვას, რომ ის გამოტოვებს მატჩს ”ბეტისთან” და სამეფო თასის 1/4 ფინალური შეხვედრის პირველ მატჩს მადრიდის ”რეალთან”.
