ხორვატიის ნაკრების მეკარე დომინიკ ლივაკოვიჩმა “ბარსელონაში” არსებულ კონკურენციასა და გუნდის ვარჯიშების ინტენსივობაზე ისაუბრა. 31 წლის ფეხბურთელმა, რომელმაც კატალონიურ კლუბში გადასვლის შემდეგ მხოლოდ ერთი ოფიციალური მატჩი ჩაატარა, აღნიშნა, რომ სათამაშო დროის სიმცირის მიუხედავად, მოთმინებას ინარჩუნებს.
Mundo Deportivo-ს ცნობით, ლივაკოვიჩმა ხორვატიის ნაკრების შეკრებაზე “ბარსელონაში” თამაშის მნიშვნელობაზე ისაუბრა:
“ზადარელი ბიჭი ვარ, “ბარსელონაში” ვთამაშობ და ამით ნამდვილად ძალიან ვამაყობ. ასეთი დიდი კლუბის კარი უკვე დავიცავი. ვვარჯიშობ, ჩემს შანსს ველოდები და თავს კარგად ვგრძნობ”.
ხორვატი მეკარე “ბარსელონამ” ზაფხულის სატრანსფერო ფანჯრის ბოლოს “ფენერბაჰჩედან” 2 მილიონ ევროდ შეიძინა და მასთან კონტრაქტი 2030 წლამდე გააფორმა.
ლივაკოვიჩმა კატალონიური გუნდის მაისურით ერთადერთი ოფიციალური მატჩი 19 სექტემბერს, “სევილიას” წინააღმდეგ ჩაატარა, როდესაც ჟოან გარსია ტრავმირებული იყო. “ბარსელონამ” ის შეხვედრა 3-1 მოიგო.
ლივაკოვიჩი ყოველდღიურად ჟოან გარსიასთან, ვოიცეხ შჩესნისთან და იკერ როდრიგესთან ერთად ვარჯიშობს. მეკარეების მომზადებას ხოსე რამონ დე ლა ფუენტე ხელმძღვანელობს.
“ბარსელონაში” ვარჯიშები ნამდვილად ძალიან რთულია, რადგან მსოფლიოს საუკეთესო ფეხბურთელებზე ვსაუბრობთ. იდეალური იქნებოდა, ყველა მატჩში მე დამეცვა კარი, მაგრამ ჩემს შანსს მოთმინებით ველოდები”, – განაცხადა ლივაკოვიჩმა.
ხორვატიის ნაკრებში 84 მატჩის ჩამტარებელ მეკარეს სათამაშო პრაქტიკა ეროვნულ გუნდში არ აკლია, თუმცა “ბარსელონაში” ძირითად შემადგენლობაში დამკვიდრება ჯერ ვერ შეძლო.
თუ ჟოან გარსიას ჯანმრთელობის პრობლემა არ შეექმნება, ლივაკოვიჩს მორიგი შანსი შესაძლოა 15 ან 16 დეკემბერს, ესპანეთის თასის 1/16 ფინალში მიეცეს. კატალონიელები ერთმატჩიან დაპირისპირებაში დაბალი დივიზიონის წარმომადგენელს შეხვდებიან.
ხორვატიის ნაკრების მთავარმა მწვრთნელმა სლავენ ბილიჩმაც გამოთქვა სურვილი, რომ მისმა მეკარემ “ბარსელონაში” მეტი სათამაშო დრო მიიღოს:
“გვსურს, ლივაკოვიჩი “ბარსელონაში” რეგულარულად თამაშობდეს. ის ძალიან კარგი მეკარეა”.
forum კომენტარები (0)