მოდით სრულად განვიხილოთ 2011 წელი, რომელიც სულ მალე გაიხურავს კარს. რა იყო კატალონიის “ბარსელონასთვის” ამ წელს სასიხარულო და სამწუხარო? სწორედ ამაზე ვისაუბრებთ ამ სტატიაში.
იანვარი
წელი “ბარსელონასთვის” ბრწყინვალედ დაიწყო. ლიონელ მესი, ჩავი ერნანდესი და ანდრეს ინიესტა იყვნენ ის სამი კანდიდატი, რომელიც მიიღებდა “ოქროს ბურთს“. სამივე “ლა მასიადან” იყვნენ და ასეთი რამ ისტორიის მანძილზე პირველად მოხდა. საბოლოო ჯამში, ეს პრიზი არგენტინელს ხვდა წილად, თუმცა ესპანელები ამით არ დამწუხრებულან და თქვეს, რომ მთავარია “ოქროს ბურთი” მათ ოჯახს ერგო. ლეო გახდა პირველი ფეხბურთელი, რომელმაც “ბარსას” მაისურით ზედიზედ ორჯერ მოიგო ეს ტიტული. რაც შეეხება ხოსეპ გვარდიოლას, იგი დასახელებულ იქნა 2010 წლის მესამე საუკეთესო მწვრთნელად. როდესაც “ბლაუგრანამ” “კამპ ნოუზე” “ბეტისი” მიიღო და 5:0 გაანადგურა, გამარჯვებულებმა მოპოვებული ჯილდოები გულშემატკივრებს წარუდგინეს დიდი სიყვარულით.
თებერვალი
2011 წლის 20 თებერვალს, ხოსეპ გვარდიოლამ ესპანეთის პრიმერა დივიზიონში გუნდს მეასედ უმწვრთნელა. მისი შედეგი ამ 100 მატჩში, მან 79 მოგება, 14 ფრე და მხოლოდ 7 მარცხი განიცადა–საუკეთესო რეკორდი “ბარსელონას” ისტორიაში. ამ თამაშებში, პეპმა სულ 40 სხვადასხვა ფეხბურთელი გამოიყენა, რომელთაგანაც 56% “ბარსაში” იყვნენ “დამზადებულნი“, ანუ აღზრდილები იყვნენ “ლა მასიაში“. მან 68 კვირა გაატარა ჩემპიონატში პირველ პოზიციაზე. მართლაც რომ გასაოცარი სტატისტიკაა.
მარტი
გუნდმა სეზონის შუაში ძალიან მძიმე დარტყმა მიიღო, როდესაც გაირკვა, რომ ერიკ აბიდალს ღვიძლის კიბო ჰქონდა. ფრანგი, რომელმაც შეძლო, რომ სარეკორდო დროში დაბრუნებულიყო, მოახერხა და შეუერთდა გუნდს სეზონის დასრულებამდე. მთელი მისი არ ყოფნის მანძილზე, გულშემატკივრები და სპორტსმენები მას მხარში ედგნენ გაჭირვებისას და სოციალური ქსელებისა და სხვადასხვა სახის ბანერების საშუალებით ეხმარებოდნენ. “კამპ ნოუზე” უამრავი გასამხნევებელი ბანერი იყო განლაგებული. აბიდალის დაავადებამ გუნდი მხოლოდ და მხოლოდ გააძლიერა და უფრო მოუმატა ჟინი და ბრძოლის სურვილი. ისინი უფრო მეტი ტიტულისკენ მიისწრაფვოდნენ.
აპრილი
აპრილმა “კლასიკოების” მარათონი მოიტანა. ესპანეთის პრიმერა დივიზიონში “ბარსა” “რეალს” “სანტიაგო ბერნაბეუზე” ესტუმრა და შეხვედრა 1:1 დაასრულა. ეს დადებით შედეგად ჩაითვალა, რადგან ამან პრაქტიკულად გაუნაღდა გუნდს ჩემპიონობა. სამწუხაროდ, მადრიდელებმა მაინც გამოკრეს ხელი მათთვის სასიხარულო შედეგს და ვალენსიაში, ესპანეთის თასის ფინალში დამატებით დროში გაიტანეს ერთადერთი გოლი და მატჩი მინიმალური სხვაობით მოიგეს. მაგრამ ყველაფერი როდი დასრულდა. კვლავ გასამართი იყო ჩემპიონთა ლიგის 1/2 ფინალური შეხვედრები. “ლურჯ–ბროწეულისფერებმა” “თეთრებს” ორი მატჩის ჯამში 3:1 სძლიეს. განსაკუთრებით დასამახსოვრებელი იყო 2:0 “ბერნაბეუზე“, სადაც მესიმ ნამდვილად საოცარი გოლები გაიტანა. “ბარსას” “უემბლი” და ჩემპიონთა ლიგის რიგით მეოთხე თასი ელოდა…
მაისი
წლის მეხუთე თვე უბრალოდ დაუვიწყარი იყო. 11–ში, “ბარსელონამ” “ლევენტესთან” მატჩი ფრედ, 1:1 დაასრულა და მათემატიკურად გაინაღდა ზედიზედ მესამედ ესპანეთის ჩემპიონობა. 17 დღის შემდეგ, ყველა ლონდონზე იყო გამართული, სადაც კატალონიელებმა ჩემპიონთა ლიგის ფინალში “მანჩესტერს” საფეხბურთო გაკვეთილი ჩაუტარეს და დაამარცხეს, ანგარიშით 3:1. გოლები პედრომ, მესიმ და ვილამ შეაგდეს და დამსახურებულადაც მოიგეს გუნდის ისტორიაში მეოთხედ ეს ჩემპიონატი. აღსანიშნავია, რომ “ბლაუგრანამ” ბოლო 6 წელში, ეს თასი 3–ჯერ აღმართა. ბრწყინვალე გამარჯვების შემდეგ, კარლეს პუიოლმა კაპიტნის სამკლაური, როგორც ზევით ავღნიშნეთ, რეკორდულ დროში დაბრუნებულ ერიკ აბიდალს მოარგო მკლავზე და მისცა მას თასის აწევის უფლება.
ივნისი
თამაშების გარეშე არსებულ პირველ თვეში, კარლეს პუიოლმა გაიკეთა მუხლის ოპერაცია. რაც შეეხება ხოსეპ გვარდიოლას, მან 3 წლის მანძილზე გუნდს ისეთი ფეხბურთი ათამაშა, რომ მსოფლიო მოხიბლა და ასიამოვნა. პეპმა 13 საშუალებიდან 10 გამოიყენა, ანუ 13 ჩემპიონატიდან 10–ში იმარჯვა და კოლოსალური რაოდენობის თასები მოაპოვებინა “ბარსას“. ასევე ამ თვეში აღსანიშნავია ისიც, რომ “ლა მასიაში” აღზრდილი ოთხი ფეხბურთელი (მონტოია, ტიაგო, ჟეფრენი და ბოიანი) ესპანეთის 21 წლამდელთა ნაკრებს დაეხმარა ევროპის ჩემპიონატზე ბრწყინვალედ გამოსვლაში. დანარჩენი “ლურჯ–ბროწეულისფერი” მოთამაშეები კი–უკვე შემდეგ სეზონზე ფიქრობდნენ.
ივლისი
ზუსტად 3 დღის შემდეგ, რაც ჩილე გამოვარდა კოპა ამერიკიდან, ალექსის სანჩესი წარდგენილი იქნა, როგორც გუნდის პირველი შენაძენი 2011/12 წლების სეზონში. ის კვლავ არდადეგებზე იყო, როდესაც “ბარსელონამ” წისასეზონო შეხვედრები გამართა “ჰაიდუკ სპლიტთან“, “ინტერნაციონალ პორტო ალეგრესთან” და მიუნხენის “ბაიერნთან“. სანჩესი ასევე არ იყო გუნდთან ერთად ამერიკის ტურნეს დროს. ფეხბურთელი ნაყიდი იქნა იტალიური “უდინეზედან” 26 მილიონ ევროდ. “მე ბავშვობიდან ვოცნებობდი “ბარსელონაში” თამაშზე” –თქვა ჩილეელმა მას შემდეგ, რაც პირველად მოირგო ლურჯ–ბროწეულისფერი მაისური.
აგვისტო
ორ თვიანი არდადეგებისა და მომზადების შემდეგ, როგორც იქნა დაიწყო სეზონი. “ბარსელონამ” ესპანეთის სუპერთასზე ორი მატჩის ჯამში “რეალს” 5:4 სძლია. ორივე შეხვედრაში კატალონიელებმა ბრწყინვალედ ითამაშეს. კასილასის კარში გატანილი 5 გოლიდან, 3 ლიონელ მესის ანგარიშზე იყო. ამის შემდეგ იყო ევროპის სუპერთასი, სადაც “ბლაუგრანამ” კვლავ იმარჯვა, მესისა და კიდევ ერთი გამართლებული ტრანსფერის ხარჯზე; პორტუგალიელთა კარში მეორე გოლი სესკ ფაბრეგასმა გაიტანა, რომელმაც დიდი ხნის ლოდინის შემდეგ, როგორც იქნა კვლავ მოირგო ლურჯ–ბროწეულისფერი ფორმა. ეს იყო 15 შანსიდან მე–12 ტიტული გვარდიოლას ხანაში. საოცრება…
გაგრძელება იქნება…
/span
