ფრანგული “პსჟ”–ის ყოფილმა მთავარმა მწვრთნელმა ლუის ფერნანდესმა, განაცხადა, რომ მას ძალიან მოსწონს კატალონიის “ბარსელონას” ფეხბურთელი ანდრეს ინიესტა. სპეციალისტის თქმით, ესპანელი ნახევარმცველი “პრიმერა დივიზიონში” თამაშის ხარისხით მთავარ ვარსკვლავებს, ლიონელ მესის და კრიშტიანუ რონალდუსაც კი სჯობს.
“ყველა ლაპარაკობს კრიშტიანუ რონალდუზე და ლიონელ მესიზე, მაგრამ ჩემთვის ესპანეთის ჩემპიონატში ერთადერთი საუკეთესო ფეხბურთელი ანდრეს ინიესტაა. იგი თავის დავალებებს ყოველთვის კარგად ასრულებს. მას შესანიშნავად შეუძლია ბურთის კონტროლი, საოცარი გადაცემების გაკეთება და გოლების გატანა. “ბარსელონას” ნახევარმცველი ამ ყველაფერს ძალიან იოლად აკეთებს და თავად შეუძლია წარმართოს მატჩი. როდესაც ანდრესი ბურთს იღებს შეგიძლია მშვიდად იყო, რადგან ყველაფერი ისე იქნება, როგორც საჭიროა.” –განაცხადა ფერნანდესმა.
