ფერან ტორესი ბარსელონას ყველა დროის საუკეთესო ბომბარდირების 50-ეულშია

ფერან ტორესს ახლა 201 ოფიციალურ მატჩში 62 გოლი აქვს გატანილი, რითაც ესპანელი თავდამსხმელი კლუბის ყველა დროის საუკეთესო ბომბარდირების 50-ეულში მოხვდა.

“სპოტიფაი კამპ ნოუზე” “ესპანიოლის” წინააღმდეგ შესრულებული დუბლით, ფერანმა იოჰან კრუიფს (60 გოლი 180 თამაშში), ხოსე ბრავოს (60 გოლი 139 თამაშში), მარტი ვანტოლრას (60 გოლი 124 თამაშში) და მარსიალ პინას (61 გოლი 276 თამაშში) გადაასწრო. ახლა ის მხოლოდ ერთი გოლით ჩამორჩება ვისენს პიერას და ორით – ჩუს პერედასა და საგი ბარბას. 72 გოლით ხავიერ სავიოლა ამჟამად მე-40 ადგილს იკავებს.

ეს მნიშვნელოვანი სტატისტიკაა, რადგან “ბარსელონას” ამჟამინდელი შემადგენლობიდან ფერან ტორესზე მეტი გოლი კლუბისთვის მხოლოდ რაფინიას (73 გოლი) და ლევანდოვსკის (118 გოლი) აქვთ გატანილი.

გოლები ყველა ტურნირზე

ფერან ტორესი “ბარსელონას” 2021/22 წლების სეზონის ზამთრის სატრანსფერო ფანჯრის დროს შეუერთდა და მას შემდეგ გოლებს ყველა ტურნირზე აგროვებს. მისი სტატისტიკის უფრო დეტალურად განხილვისას ვნახავთ, რომ ფერან ტორესს ლა ლიგის 135 თამაშში 39 გოლი აქვს გატანილი, ხოლო ჩემპიონთა ლიგაზე – 11 გოლი 33 თამაშში. ევროპა ლიგის 8 თამაშში მან თავი 2 გოლით გამოიჩინა, ხოლო ქვეყნის თასზე, კოპა დელ რეიზე, 17 თამაშში 9 გოლი აქვს გატანილი. ესპანეთის სუპერ თასის 8 შეხვედრაში მან მეტოქეთა კარის აღება ერთხელ შეძლო.

ახლოსაა სეზონის საუკეთესო სტატისტიკის დაფიქსირებასთან

ლა ლიგის დასრულებამდე შვიდი ტურით ადრე, ლურჯ-ბროწეულისფერთა შვიდიანმა ტურნირზე თავისი საუკეთესო სეზონი უკვე ჩაატარა, რადგან მისმა 14-მა გოლმა გასული სეზონის რეკორდი (10 გოლი) უკვე მოხსნა. მეტიც, თუ სეზონს მთლიანობაში განვიხილავთ, ფერან ტორესს 18 გოლი აქვს გატანილი (14 ლა ლიგაში, 2 ჩემპიონთა ლიგაზე, 1 კოპა დელ რეიზე და 1 ესპანეთის სუპერ თასზე), რაც იმას ნიშნავს, რომ მას მხოლოდ ერთი გოლი აშორებს “ბარსელონაში” თავისი საუკეთესო სეზონის გამეორებამდე, რომელიც მან გასულ სეზონში დააფიქსირა, როდესაც 19 გოლი გაიტანა (10 ლა ლიგაში, 6 კოპა დელ რეიზე და 3 ჩემპიონთა ლიგაზე).