ბარსას 19-წლამდელთა გუნდი ჩემპიონთა ლიგის 1/2-ფინალშია

“ბარსელონას” 19-წლამდელთა გუნდი უეფას ახალგაზრდულ ლიგაზე წარმატებით გამოსვლას განაგრძობს.

ჯგუფური ეტაპის მარტივად დაძლევის შემდეგ ახალგაზრდა კატალონიელებმა ჯერ ზაგრების “დინამოს” სძლიეს, შემდეგ “ასტონ ვილას”, დღეს კი “შტუტგარტს”.

გერმანიაში გამართულ მეოთხედფინალურ შეხვედრაში მასპინძლები 29-ე წუთზე დაწინაურდნენ, მაგრამ მე-40 წუთზე არნაუ პრადასმა გაათანაბრა, მეორე ტაიმის დასაწყისში კი იან ვირხილიმ წინ “ბლაუგრანა” გაიყვანა და საბოლოო ანგარიშიც დააფიქსირა.

“ბარსას” კარში ქართული ფესვების მქონე არონ იააკობიშვილი იდგა, რომელსაც მორიგი კარგი მატჩი ჰქონდა. არონმა 8 დარტყმა მოიგერია, აქედან რამდენიმე რთული.

აღსანიშნავია ისიც, რომ “ბარსელონას” კიდევ ერთი გოლის მარტივად გატანა შეეძლო. საქმე ისაა, რომ ბოლო წამებზე “შტუტგარტის” მეკარე კატალონიელთა საჯარიმოში იყო ჩასული, სტუმრებმა შეტევა მოიგერიეს, კონტრშეტევაზე გადავიდნენ და ის იყო, ცარიელ კარში უნდა გაეტანათ, რომ მსაჯმა თამაში დაასრულა.

1/2-ფინალში “ბარსელონას” მეტოქე “ალკმაარსა” და “მანჩესტერ სიტის” შორის გამარჯვებული იქნება. ეს შეხვედრაც დღეს გაიმართება. მეორე ნახევარფინალურ წყვილში კი ერთმანეთს “ზალცბურგი” და “ტრაბზონსპორი” დაუპირისპირდებიან.

“ბარსელონას” 19-წლამდელთა გუნდს უეფას ახალგაზრდული ლიგა 2-ჯერ აქვს მოგებული, რაც “ჩელსისთან” ერთად საუკეთესო შედეგია. კატალონიელებს კარგი შანსი აქვთ, წელს ამ მაჩვენებლით ერთპიროვნულად გალიდერდნენ. თუმცა თავის მხრივ “ალკმაარსა” და “ზალცბურგს” აქვთ შანსი, “ბარსელონასა” და “ჩელსის” დაეწიონ.