დღეს ჩემპიონთა ლიგის წილისყრაა | ახალი ფორმატი

დღეს ევროპის ყველაზე პრესტიჟული საფეხბურთო საკლუბო ტურნირის წილისყრა გაიმართება, რომლის დროსაც “ბარსელონას” მეტოქეების ვინაობა ცნობილი გახდება.

ჩემპიონთა ლიგის 2024/25 წლების სეზონი ახალი ფორმატით ჩატარდება. ეს ნიშნავს, რომ ახალი სეზონიდან ჯგუფური ეტაპი აღარ იქნება. ამიერიდან ლიგაზე მონაწილეობას 36 კლუბი მიიღებს. ახალი ფორმატის მიხედვით, გუნდები თავდაპირველად 8 მატჩს ითამაშებენ (4 სახლში, 4 გასვლაზე). მეტოქეების ვინაობა შემთხვევითობის პრინციპით გაირკვევა. ეს ეტაპი ლიგის ფაზის სახელწოდებით იქნება ცნობილი.

იმისათვის, რომ 8 განსხვავებული მოწინააღმდეგე გამოვლინდეს, გუნდები, ინდივიდუალური საკლუბო კოეფიციენტის მიხედვით, 4 კალათაში იქნებიან განთესილნი. ლიგის ფაზაში კლუბებს თავიანთი ქვეყნის წარმომადგენლებთან დაპირისპირება არ შეუძლიათ. ასევე გამორიცხულია კონკრეტული ქვეყნის ორზე მეტ წარმომადგენელთან შეხვედრა. მაგალითად, “ბარსას” შემთხვევაში “ბლაუგრანა” ლიგის ფაზაში ესპანურ და ერთი ქვეყნის ორზე მეტ გუნდს ვერ შეხვდება.

“ბარსელონა” პირველ კალათაშია წარმოდგენილი. თითოეული კალათა 9 კლუბითაა დაკომპლექტებული. გუნდები ასე არიან გადანაწილებულები:

პირველი კალათა: რეალ მადრიდი, მანჩესტერ სიტი, ბაიერნი, პსჟ, ლივერპული, ინტერი, დორტმუნდი, ლაიფციგი, ბარსელონა.

მე-2 კალათა: ლევერკუზენი, ატლეტიკო, ატალანტა, იუვენტუსი, ბენფიკა, არსენალი, ბრიუგე, შახტარი, მილანი.

მე-3 კალათა: ფეინოორდი, სპორტინგი, პსვ, დინამო ზაგრები, ზალცბურგი, ლილი, ცრვენა ზვეზდა, იანგ ბოისი, სელტიკი.

მე-4 კალათა: სლოვანი, მონაკო, სპარტა, ასტონ ვილა, ბოლონია, ჟირონა, შტუტგარტი, შტურმი, ბრესტი.

“ბარსა” თითოეული კალათიდან 2 გუნდს დაუპირისპირდება.

ლიგის ფაზა სტარტს 17 სექტემბერს აიღებს და 29 იანვარს დასრულდება.

წილისყრა თბილისის დროით 20:00 საათზე დაიწყება. პირდაპირ რეპორტაჟს სილქ უნივერსალი გვთავაზობს.