ოფიციალურად: ბარსელონა წლის ბოლოს დალასში კლუბ ამერიკას დაუპირისპირდება

“ბარსელონა” 2023 წელს მექსიკურ “ამერიკასთან” მატჩით დაასრულებს – შეხვედრა 21 დეკემბერს, დალასში გაიმართება. 

“ალმერიასთან” შეხვედრის (20 დეკემბერს) დასრულებისთანავე გუნდი აშშ-ში გაემგზავრება. “ამერიკასთან” მატჩი “ქოთონ ბოულ სთედიუმზე” ჩატარდება, სადაც “ბარსა” 2022 წლის ზაფხულში “იუვენტუსს” დაუპირისპირდა. შეხვედრის დასრულების შემდეგ ფეხბურთელები ბარსელონაში დაბრუნდებიან (ან იქ გაემგზავრებიან, სადაც საშობაოდ წასვლა სურთ).

Soccer Media Solutions-ის მიერ ორგანიზებული შეხვედრა ამ გუნდებს შორის ისტორიაში მე-7 მატჩი იქნება. პირველად ისინი ერთმანეთს 1937 წლის ცნობილი ჩრდილოეთ ამერიკული ტურნეს დროს დაუპირისპირდნენ. ბოლოს “ბარსელონა” და “ამერიკა” ერთმანეთს 12 წლის წინ, 2011 წელს, ასევე დალასში შეხვდნენ – მატჩი კატალონიელთა გამარჯვებით, 2-0 დასრულდა.

აღსანიშნავია, რომ “კლუბ ამერიკაში” “ბლაუგრანას” ყოფილი ფეხბურთელი, ჯონათან დოს სანტოსი თამაშობს.