ბარსელონა Nike-ს სხვა კომპანიით ჩანაცვლების ვარიანტს განიხილავს

მარკეტინგის საკითხებში “ბარსელონას” ვიცე-პრეზიდენტმა, მარკ გიუმ გასულ კვირაში განაცხადა, რომ “ბლაუგრანას” ბრენდი დღეს ისეთი ძლიერია, როგორც არასდროს.

ბოლო წლებში “ბარსელონას” არაერთი ახალი სპონსორი გამოუჩნდა და მსურველების რიგი არ წყდება. ამჯერად საუბარი მაისურების მწარმოებელ კომპანიებზეა.

Sport-ის ცნობით “ბარსას” ფორმაზე Nike-ს ლოგოს ჩანაცვლების მსურველი არაერთია, მათ შორის Puma. კომპანიები “ბარსელონას” უფრო მეტ ფულს სთავაზობენ, ვიდრე კატალონიელები “ნაიკისგან” იღებენ.

“ბარსელონა” და “ნაიკი” 1998 წლიდან თანამშრომლობენ. მხარეებს შორის ბოლო შეთანხმება 2016 წელს შედგა, ის ძალაში 2018 წელს შევიდა და მოქმედი 2028 წლამდეა. “ბარსელონა” “ნაიკისგან” წელიწადში 105 მილიონ ევროს იღებს, ბონუსების გათვალისწინებით კი ეს თანხა, შესაძლოა, 155 მილიონამდე გაიზარდოს.

“ბლაუგრანას” ხელმძღვანელობა მზადაა, სხვა კომპანიების შეთავაზებები განიხილოს, პარალელურად კი პირობების გადახედვაზე მოლაპარაკებებს Nike-თანაც იწყებს. ამერიკულ კომპანიას პირობების შეცვლის დიდი სურვილი არ აქვს, მაგრამ კატალონიელები თავიანთ აზრზე რჩებიან, რადგან მათ იციან, რომ ბაზარი მათ უფრო ხელსაყრელ პირობებს სთავაზობს.