ბარსელონა ვიტორ როკეში მაქსიმუმ 45 მილიონს გადაიხდის

ვიტორ როკეს “ბარსელონაში” გადმოსვლას კლუბების მიერ ტრანსფერის ოფიციალურად დადასტურებაღა აკლია.

ცნობილია, რომ 18 წლის ფეხბურთელში “ბარსელონა” 30 მილიონ ევროს გადაიხდის, კიდევ 31 მილიონი ბონუსების სახითაა გათვალისწინებული, ხოლო თუ “ბლაუგრანა” როკეს 61 მილიონ ევროზე ძვირად გაყიდის, “ატლეტიკო პარანაენსეს” სატრანსფერო თანხის 20% შეხვდება.

Sport-ის ცნობით ვიტორ როკეს ტრანსფერზე მატეუ ალემანიმ ძალიან წარმატებული მოლაპარაკებები აწარმოა, რის შედეგადაც მივიღეთ ტრანსფერი, რომელშიც “ბარსელონა” მაქსიმუმ 45 მილიონ ევროს გადაიხდის.

“ატლეტიკო პარანაენსე” ვიტორ როკეში თავიდანვე 45 მილიონ ევროს ითხოვდა – 35 მილიონი ფიქსირებული და 10 მილიონი ბონუსები. კლუბები ფეხბურთელის ფასზე დაახლოებით 3 კვირის წინ შეთანხმდნენ.

თუმცა მას შემდეგ ის შეიცვალა, რომ ბრაზილიელთა აღმასრულებელ დირექტორს, ალექსანდრე მატოსს გაუჩნდა ამბიცია, ვიტორ როკეს ტრანსფერი ფურცელზე ბრაზილიური ფეხბურთის ისტორიაში ყველაზე ძვირადღირებული ყოფილიყო. ვინაიდან კიდევ ერთი ბრაზილიელი ტალანტი ენდრიკი “პალმეირასიდან” “რეალ მადრიდში” 60 მილიონ ევროდ გადადის (35 მილიონი ფიქსირებული და 25 მილიონი ბონუსები), “პალმეირასის” ყოფილ აღმასრულებელს, ალექსანდრე მატოსს სურდა, რომ ვიტორ როკეს ტრანსფერის ფასი 61 მილიონი ევრო ყოფილიყო.

მოლაპარაკებების შედეგად გადაწყდა, რომ როკეს ტრანსფერის ფიქსირებული თანხა 30 მილიონი ევრო იქნებოდა და მას “ბარსა” 4 ნაწილად გადაიხდიდა, ბონუსები კი 31 მილიონი ევროთი განისაზღვრა. თუმცა Sport-ის მტკიცებით ბონუსებით გათვალისწინებული პირობების სრულად შესრულება თითქმის შეუძლებელია, ისინი მხოლოდ ფურცელზე იქნება დაფიქსირებული, რეალურად კი “ბლაუგრანა” დაახლოებით 45 მილიონს გადაიხდის – 30 მილიონი ფიქსირებული და 15 მილიონი ბონუსები.

როგორც ჩანს, ალექსანდრე მატოსს ნეიმარის ტრანსფერის შესახებ არაფერი სმენია. 2013 წელს ბრაზილიელი “სანტოსიდან” “ბარსელონაში” 88 მილიონ ევროდ გადმოვიდა.