მიკაილ ფაიმ სხვა გრანდების შემოთავაზებები არცკი განიხილა

Mundo Deportivo-ს ინფორმაციით, 2019 წელს გამართული 17-წლამდელთა მსოფლიო ჩემპიონატის  შემდეგ (რომელზეც ის მხოლოდ 15 წლის იყო), “ბარსელონას” ახალწვეულის, მიკაილ ფაის შეძენით არაერთი გრანდი ინტერესდებოდა.

მიუხედავად იმისა, რომ ახალგაზრდა მცველს “ჩელსი”, “მანჩესტერ სიტი”, “ლაიფციგი”, “მილანი” და “დორტმუნდი” მეტ თანხას სთავაზობდნენ, როდესაც სენეგალელი “ბარსას” რადარზე გამოჩნდა, მან თავის აგენტს უთხრა, რომ “ბარსელონას” გარდა სხვა ვარიანტები არც განეხილა. ფაის ისიც კი არ სურდა, რომ აგენტს “ბლაუგრანას” შეთავაზების გაუმჯობესება ეცადა. კონტრაქტის გაფორმების შემდეგ მიკაილმა ჟოან ლაპორტას, მატეუ ალემანისა და დეკუს მადლობა გადაუხადა, რომ ოცნების ასრულების შანსი მისცეს.

სენეგალელს სურს, სიუტატ ესპორტივასთან ახლოს იცხოვროს, რათა ვარჯიშებზე ყოველდღე ფეხით იაროს. ის მხოლოდ გულმოდგინედ მუშაობაზე ფიქრობს, რათა ადგილი ჯერ სარეზერვო გუნდში მოიპოვოს, შემდეგ კი ჩავი ერნანდესი დაარწმუნოს, რომ პირველ გუნდში თამაში შეუძლია.

ფაი 10 ივლისიდან პრესეზონს ჩავის მეთვალყურეობის ქვეშ დაიწყებს და სავარჯიშო სესიებზე მონაწილეობას მიიღებს, შემდეგ კი მწვრთნელი გადაწყვეტს, ის საზაფხულო ტურნეზე ამერიკის შეერთებულ შტატებში გუნდთან ერთად გაემგზავრება თუ არა.

აღსანიშნავია, რომ მიკაილს გასული სეზონის პირველი ნახევარი გაუცდა. მისმა მშობლიურმა კლუბმა “დიამბარსმა” “მარსელთან” ყველაფერი ისე შეათანხმა, რომ ფაიმ არაფერი იცოდა, ხელმოწერა გააყალბა და ტრანსფერი დახურა.

სენეგალელი ფეხბურთელის აგენტმა ეს საქმე FIFA-ში გაასაჩივრა და გამართლდა კიდეც, მაგრამ ამის გამო ფაის 6 თვის განმავლობაში თამაშის უფლება არ ჰქონდა და ხორვატულ “კუსტოშიასთან” ერთად მხოლოდ ვარჯიშობდა. ახლა მან ოცნება აისრულა და “ბარსელონას” წევრია.