მსოფლიოს 2022 წლის ჩემპიონატამდე ლუის ენრიკეს ესპანეთის ნაკრებში მუშაობას წარუმატებელი ნამდვილად არ ეთქმოდა. თუმცა კატარის მუნდიალზე განცდილმა კრახმა სიტუაცია შეცვალა და ფედერაციამ 52 წლის სპეციალისტი გაათავისუფლა.
გუშინ ღამით ლუჩო Twitch-ის სტრიმერ იბაი ლიანოსთან იყო სტუმრად და როგორც იბაის გადაცემების შემთხვევაში უმეტესად ხდება ხოლმე, საინტერესო ინტერვიუ გამოვიდა.
ესპანეთის ნაკრებში ჩემი დრო დასრულდა, ახლა კი თავისუფალი დროით სიამოვნება უნდა მივიღო.
სტრიმერობით სიამოვნებას ვიღებდი. გულშემატკივრებთან კავშირს ვგრძნობდი. ეს ძალიან კარგი იყო.
იბაი, მაგიდაზე ძალიან ბევრი განათება გაქვს. ეს “კამპ ნოუს” ჰგავს.
მაროკოსთან კარგად არ გვითამაშია, თუმცა მსოფლიო ჩემპიონატზე კარგად ვითამაშეთ. ნაკრებში 4 წელი ვიმუშავე და ვფიქრობ, ეს პერიოდი წარმატებული იყო. კმაყოფილი ვარ იმით, რაც გავაკეთე.
ყველაზე მნიშვნელოვანი ისაა, რომ ხალხს ესპანეთის ნაკრების თამაშის ყურების სურვილი დავუბრუნეთ. რა თქმა უნდა, უკეთ უნდა გვეთამაშა. მაგრამ ასეთია ფეხბურთი.
როდესაც საქმე ნაკრებში გამოსაძახებელ ფეხბურთელებს ეხება, არავის ვუსმენ. ჟურნალისტები იმ დროის 10%-საც კი არ ხარჯავენ, რასაც მე და ჩემი სტაფი ფეხბურთს ვუძღვნით. თუმცა ჟურნალისტებს მაინც სურთ, რომ მათ დავუჯეროთ. ეს ასე მარტივი არაა. მე და ჩემი გუნდი ვმუშაობთ იმისათვის, რომ იდეალური ფეხბურთელები გამოვიძახოთ.
თუ ქუჩაში ვინმე დამარტყამს, თავი თავად უნდა დავიცვა და მას დარტყმით ვუპასუხო. პრესკონფერენციების დროს ჟურნალისტები ერთ შეკითხვას ათჯერ მისვამდნენ, მე ცხრაჯერ ვუპასუხებდი, მეათედ კი გავბრაზდებოდი. საბოლოოდ მედიაში სწორედ მეათე პასუხი ხვდებოდა. სტრიმების შემთხვევაში კი სიტუაცია განსხვავებულია.
ვფიქრობ, გამოსამშვიდობებლად კიდევ ერთ სტრიმი მქონდეს.
ესპანეთის ნაკრების მთავარი მწვრთნელის პოსტზე ლუის დე ლა ფუენტეს იმედი მაქვს. ის ასაკობრივ ნაკრებებს 10 წლის განმავლობაში წვრთნიდა. ის ძალიან კარგია და მას წარმატებებს ვუსურვებ.
რას ვეტყვი იმ ხალხს, რომლებიც მსოფლიო ჩემპიონატის მიმდინარეობისას სტრიმერობის გამო მაკრიტიკებდა? იცით, რამდენი საათი გავატარეთ მე და ჩემმა გუნდმა მატჩების ანალიზში? ჩვენ ტაქტიკური კამერები გვქონდა და ვიდეოებს ვაანალიზებდით.
ხელმძღვანელობას სტრიმებთან დაკავშირებით ჩემთვის არაფერი უთქვამს. მთელი ეს ხმაური მედიამ შექმნა. ამას ჩემ თავისუფალ დროს ვუთმობდი. მეც და ჩემი გუნდის წევრებიც ყოველთვის პროფესიონალები ვიყავით. თამაშებისა და ჩვენი ჯგუფის ანალიზში ბევრი საათი გვაქვს დახარჯული.
მინდა, საკლუბო ფეხბურთში დავბრუნდე.
მაროკოს 120 წუთის განმავლობაში ვჯობდით, მაგრამ მეტოქემ ძალიან კარგი დაცვით თამაში აჩვენა და არ ვიცოდით, როგორ უნდა შეგვექმნა შანსები. მაროკო ძალიან კარგ მსოფლიო ჩემპიონატს ატარებს.
თერთმეტმეტრიანების სერიის დროს ვნერვიულობდი. სკამზე დავჯექი და ფეხბურთელების ნაცვლად ტაბლოს ვუყურებდი. გულშემატკივრების რეაქციით ვხვდებოდი, გავიდა თუ არა დარტყმული.
პორტუგალიასთან მაროკოს თამაში ვნახე. ამ გუნდმა დაიმსახურა ის, რასაც მიაღწია. ეს ისტორიული ამბავია.
ვწუხვარ იმის გამო, რომ ჩემპიონატი ვერ მოვიგეთ. მაღალი დონის გუნდი გვყავდა. ვფიქრობდი, რომ ტურნირის მოგება შეგვეძლო, ამის რეალური შანსი გვქონდა. ფეხბურთელების გამო ნამდვილად ვწუხვარ.
ჟერარ პიკეს ჩემთან ერთად ომში ყოველთვის წავიყვან. ის ერთ-ერთი ყველაზე კონკურენტუნარიანი ფეხბურთელია.
მინდა, რომ ლეო მესიმ მსოფლიო ჩემპიონატი მოიგოს ყველაფერი იმისათვის, რასაც ის ფეხბურთისთვის ნიშნავს.
ვხედავ ხოლმე, რომ მშობლებს 10 წლის ბავშვები ფეხბურთზე მიჰყავთ და ეუბნებიან “ბევრი გოლი უნდა გაიტანო” ან “ესა და ეს უნდა გააკეთო”… ღმერთო ჩემო, და ამის შემდეგ ეს ბავშვები მსაჯებს შეურაცხყოფას აყენებენ. ეს ყველაფერი საზოგადოების ანარეკლია. ეს სირცხვილია.
ჩემი მშობლები ჩემზე ზეწოლას არასდროს ახდენდნენ. ვარჯიშზე მაშინ მივდიოდი, როდესაც ამის სურვილი მქონდა, ვთამაშობდი მაშინ, როცა მინდოდა. ასე ფეხბურთითა და ბავშვობით სიამოვნებას ვიღებდი. და შემომხედეთ, პროფესიონალი ფეხბურთელი გავხდი.
დღეში 7-8 საათი მძინავს. ამას დიდ მნიშვნელობას ვაქცევ. დასაძინებლად წასვლამდე ბოლო 2 საათი არანაირ ეკრანს არ ვუყურებ. ეს სხეულისთვის კარგია.
მაროკოსთან გამართული თამაშის წინ ბონოს მიერ მოგერიებული თერთმეტმეტრიანები გავაანალიზეთ. კარიერის განმავლობაში ეს მეკარე კუთხეს 80% შემთხვევებში იცნობს ხოლმე. აქ საუბარია არა სეივზე, არამედ ბურთის მიმართულების გამოცნობაზე. ეს დაუჯერებელია. ბონო ძალიან კარგია.
ჩემი საუკეთესო მეგობარი “ბარსაში”? პუიოლი, დე ლა პენია და აბელარდო. ისინი ჩემთვის ძმებივით არიან. პუიოლთან ახლო ურთიერთობას ვინარჩუნებ.
ვფიქრობ, პაბლო სარაბიას მსოფლიო ჩემპიონატზე მეტი სათამაშო დრო უნდა მიეღო. მან მაროკოსთან ბოლო წუთები ითამაშა. ამ საკითხში შევცდი.
არის თუ არა ფეხბურთელი, რომელსაც დღევანდელი გადმოსახედიდან 26-კაციან განაცხადში აღარ შევიყვანდი? კი, არის ერთი, თუმცა მას არ დავასახელებ. ერთი ფეხბურთელი ისეთი არ გამოდგა, როგორსაც ვფიქრობდი და შესაძლებლობა რომ მქონოდა, მას სხვა მოთამაშით შევცვლიდი.
მაროკოსთან თამაშის შემდეგ ფეხბურთელებთან გასახდელში არ ჩავსულვარ. ასეთი რაღაცები არ მომწონს. ამ დროს ფეხბურთელები ნეგატიურ განწყობაზე არიან. მეორე დღეს ყველა მათგანს ინდივიდუალურად ვესაუბრე.
მოგებული თამაშის შემდეგ ფსიქოლოგი რჩევას გაძლევს, რომ ფეხბურთელებს ისე აღნიშვნის საშუალება მისცე, როგორც ეს მათ სურთ. მაგრამ მარცხის შემდეგ რეკომენდებულია, რომ არაფერი გააკეთო, საქმე მეორე დღისთვის გადადო.
თუ ფეხბურთელი კარგად ვერ თამაშობს, ეს ჩემი ბრალია. საკმარისად კარგად არ ვიმუშავე იმისათვის, რომ მას კარგად ეთამაშა.
ვინ გამაკვირვა ყველაზე მეტად მსოფლიო ჩემპიონატზე? რამდენიმე მოთამაშემ მაროკოდან, მაგრამ ყველაზე მეტად პედრიმ გამაოცა. ის ჰარი პოტერს ჰგავს… ის ჯადოქრობებს სჩადის. პედრი გადარეულია, არ ვიცი, როგორ უნდა ავხსნა კარგად. მან მე გამაოცა, მაგრამ ამავდროულად არ გავუოცებივარ.
ვფიქრობდი, რომ ესპანეთში ნაკრებთან დაკავშირებით გადაწყვეტილება უნდა მიმეღო, მაგრამ ეს საჭირო აღარ გახდა. ფედერაციიდან მითხრეს, რომ ჩემთან კონტრაქტის გახანგრძლივებას არ აპირებდნენ.
ლუის ენრიკე: მსოფლიო ჩემპიონატზე კარგად ვითამაშეთ
კარგ თამაშს შედეგით აფასებენ, შენ მსოფლიო ჩემპიონობას უმიზნებდი და 4 თამაშიდან ერთი მოიგე 1 ფრე გააკეთე და 2-იც წააგე. ვერავინ ვერ იტყვის რომ ეს კარგი თამაშის შედეგია.
მე მგონი ფერანზე ამბობს :დდ
წადი და იგულავე რაა… გიხმარათ ყველა მაროკომ…
ესპანეთის გულშემატკივარი არ ვარ, ასე რომ ნაკლებად მაინტერესებს როგორ ითამაშეთ, უბრალოდ როდესაც ესპანეთი ხარ გაცილებით მეტი მოგეთხოვება ვიდრე ზედიზედ 3 მსოფლიოს ისე დატოვება რომ მეოთხედფინალშიც ვერ გახვიდე, თან არც თუ ისე დიდ გუნდებთან ჭიდილში.