ტიბო კურტუას ელ კლასიკოში თამაში თითქმის გამორიცხულია

“ბარსელონას” მსგავსად “ელ კლასიკოს” “რეალ მადრიდიც” სერიოზული საკადრო პრობლემით ხვდება.

კატალონიელებისგან განსხვავებით მადრიდელებს მხოლოდ ერთი ტრავმირებული ფეხბურთელი ჰყავთ, მაგრამ ძალიან მნიშვნელოვანი. საუბარი ტიბო კურტუაზე გვაქვს.

ბოლო წლებისგან განსხვავებით ამ სეზონში “ბარსელონასა” და “რეალ მადრიდს” ორ-ორი მაღალი დონის მეკარე არ ჰყავთ. ესპანური გრანდები ტერ შტეგენისა და კურტუას იმედად არიან და თუ პირველი მეკარე ტრავმირებული ან დისკვალიფიცირებული იქნება, გუნდს სერიოზული პრობლემა შეექმნება. სწორედ ასეთ მდგომარეობაშია “რეალ მადრიდი”.

კურტუამ საჯდომის ნერვის ტრავმა 29 სექტემბერს მიიღო. თავდაპირველი პროგნოზით ის მხოლოდ ერთ შეხვედრას გამოტოვებდა, “ელ კლასიკოსთვის” კი სრულ მზადყოფნაში იქნებოდა. მას შემდეგ “რეალ მადრიდმა” 4 თამაში გამართა და კურტუა ისევ ტრავმირებულია.

Relevo-ს ცნობით 30 წლის მეკარემ გუნდთან ერთად ვერც დღეს ივარჯიშა, ეს კი იმას ნიშნავს, რომ ზეგ გასამართ “ელ კლასიკოში” მისი მოედანზე ხილვა თითქმის გამორიცხულია.

“ბარსელონას” არაუხო, ბელერინი, კრისტენსენი და დეპაი არ ეყოლება. დიდი ალბათობით დაბრუნებას მოასწრებს ჟიულ კუნდე.