გადამწყვეტი თამაშები ინტერთან

“ბარსელონას” ჩემპიონთა ლიგის წილისყრაში ნამდვილად არ გაუმართლა, მაგრამ შეიძლება ითქვას, რომ გაუმართლა კალენდარში.

ტურნირის სუსტ გუნდთან საკუთარ კედლებში დაწყება ყოველთვის კარგია და “ბარსას” შემთხვევაში ასეც მოხდა – კატალონიელებმა “პლზენი” 5-1 გაანადგურეს. შემდეგ იყო “ბაიერნთან” 0-2 მარცხი, მაგრამ ამის მიუხედავად “ბლაუგრანას” კარგი შანსი აქვს, 1/8-ფინალის საგზური ჯგუფის დასრულებამდე 2 ტურით ადრე გაინაღდოს.

მომდევნო ტურში “ბარსელონა” “ინტერს” ხვდება, ჯერ სტუმრად და შემდეგ საკუთარ მოედანზე. ორივე მატჩის მოგების შემთხვევაში კი ჩავის გუნდი მომდევნო ეტაპის საგზურს გაინაღდებს.

მილანური გუნდი საუკეთესო ფორმაში ნამდვილად არაა, თანაც “ბარსას” “ნერაძურისთან” თამაში ისტორიულად არ უჭირს, თუნდაც სრულად უმოტივაციო იყოს. 14 შეხვედრაში “ინტერმა” “ბარსელონა” მხოლოდ 2-ჯერ დაამარცხა.

“ბარსას” კარგი კალენდარი აქვს “ინტერთან” თამაშების შემდეგაც. მე-5 ტურში “ბაიერნს” ვუმასპინძლებთ და თუ 2 ან მეტი ბურთის სხვაობით მოვუგებთ, ჯგუფის პირველ ადგილზე დასრულების ძალიან კარგი შანსი გაგვიჩნდება. ხოლო თუ 2 ან მეტი ბურთის სხვაობით ვერ მოვიგებთ, ტრაგედია არც ეს იქნება, რადგან ჯგუფიდან გასულები ვიქნებით, ბოლო ტურში კი “პლზენთან” დავისვენებთ და აქცენტს სრულად ლა ლიგაზე გავაკეთებთ, სადაც მაგ დროისთვის საკმაოდ დატვირთული კალენდარი გვექნება. პირიქით რომ იყოს – ჯერ “პლზენი” და შემდეგ “ბაიერნი”, შესაძლოა, ვერც პირველ ადგილზე გავსულიყავით და არც ბოლო ტურში დასვენების შანსი მოგვცემოდა.

მთავარია, “ინტერთან” ორივე თამაშის მოგება, რაც შეუსრულებელი მისია ნამდვილად არაა.