ინტერვიუ რობერტ ლევანდოვსკისთან

“ბაიერნში” გატარებული ამდენი წლის შემდეგ, რა თქმა უნდა, კლუბის შეცვლა მარტივი არ იყო, მაგრამ, ყველამ იცის, რომ ლა ლიგაში თამაში ყოველთვის მსურდა.

“ბარსელონას” ფეხბურთელებიდან რამდენიმეს უკვე ვიცნობდი, მათ შორის, მათაც, ვისთანაც არასდროს მითამაშია, და პირადი კონტაქტი მქონდა, რამაც გადაწყვეტილება გამიადვილა. ამასთან, ობამეიანგთან “დორტმუნდში” მითამაშია და მას კარგად ვიცნობ. ვფიქრობ, ადაპტაცია რთული არ იქნება, რადგან ამ პროცესისთვის საუკეთესო გზა იმის ჩვენებაა, რაც მოედანზე შეგიძლია და ასევე მის გარეთ.

ერთად გასატარებლად საკმარისი დრო გვაქვს და “ბარსელონაში” ჩემს მომავალს მოუთმენლად ველოდები.

როცა პირველად გავიგე, რომ “ბარსა” ჩემით ინტერესდებოდა, ვფიქრობდი, რომ ეს ძალიან საინტერესო იქნებოდა და ვამაყობდი. რა თქმა უნდა, “ბაიერნში” ყველაფრის მოგების შემდეგ, მინდოდა, კარიერაში ახალი ნაბიჯი გადამედგა.

როდესაც მატეუ ალემანისა და პრეზიდენტს ვესაუბრე, მივხვდი, რომ მათ გუნდში ჩემი მიყვანა ძალიან სურდათ და ტრანსფერისთვის ყველაფერს აკეთებდნენ – ჩემთვის ეს ნიშანი იყო, რომ საკუთარი თავისთვის მეთქვა: “კარგი, მზად ვარ, თქვენთან გადმოვიდე და “ბარსელონას” ღირსება დავიცვა.”

“ბარსასთვის” ბოლო თვეებიც კი რთული იყო, მაგრამ ახლა ვხედავ, რომ მომავალში ყველაფერი კარგად იქნება და გუნდი მწვერვალისკენ სწრაფად მიემართება. ამიტომაც, “ბარსელონაში” გადმოსვლაზე ბევრი არ მიფიქრია – ეს ჩემთვისა და კლუბისთვის სწორი დრო იყო.

მე ვარ ადამიანი, რომელსაც მოსმენა უყვარს და ასევე იმის თქმა, თუ რა შესაძლებლობები აქვს, ამიტომ, პრობლემები არ მექნება.

ჩავისთან პირველი საუბრის დროს მივხვდი, რომ ის საკმაოდ მკაცრია და იცის, რა უნდა გააკეთოს. ყველაფრისთვის მზად ვარ და ვიცი, რომ ერთად მუშაობით მომავალში ბევრს მივაღწევთ.

ჩავისთან მუშაობით აღფრთოვანებული ვარ, რადგან ვიცი, ფეხბურთელობის დროს მას მოედნის როგორი ხედვა ჰქონდა, ახლა კი ამას მწვრთნელის რანგში გააკეთებს. ეს ჩემთვის კარგია, რადგან კარიერის განმავლობაში ბევრი დიდებული მწვრთნელი მყოლია – იურგენ კლოპით დაწყებული, შემდეგ პეპ გვარდიოლა, ანჩელოტი, ჰანსი ფლიკი… ისინი განსხვავებული სპეციალისტები იყვნენ. ვიცი, რომ ჩავის ხელმძღვანელობით წარმატებების მიღწევა შეგვიძლია.

თუ ლა ლიგასა და ბუნდესლიგას შევადარებთ, შემიძლია ვთქვა, რომ სიჩქარეებისა და ბურთის გარეშე მოქმედების მიხედვით გერმანია უფრო ძლიერია, ესპანეთში კი უფრო მეტი ტექნიკა და ბურთის შენარჩუნება გჭირდება. პრიმერა დივიზიონში იმდენი სირბილი არ გიწევს, რამდენიც ბუნდესლიგაში. მე შემიძლია, ნებისმიერ სისტემას მოვერგო.

პეპმა ბევრი რამ ამიხსნა, არა მხოლოდ ფეხბურთზე, ის “ბარსელონაზეც” მესაუბრებოდა. გვარდიოლა 2 წელი მწვრთნიდა, მაგრამ ეს ყველაზე გრძელი 2 წელი იყო ფეხბურთში, რადგან ბევრი რამ ვისწავლე და ვესაუბრე.

ესპანური კლუბების წინააღმდეგ ჩემპიონთა ლიგაზე მითამაშია და მათი დონე ვიცი.

ალბათ, არ ვარ ადამიანი, რომელიც ყოველ წუთს საუბრობს, მაგრამ ვცდილობ, მოედანზე ლიდერი ვიყო და თანაგუნდელებს დავეხმარო.

როცა პედრი, გავი და ანსუ ფატი პირველად ვნახე, მივხვდი, რომ მათ უდიდესი პოტენციალი აქვთ. დარწმუნებული ვარ, ისინი ყოველ მატჩში განვითარდებიან.

“ბარსელონას” ადგილი მწვერვალზეა. მინდა, ფანებს უდიდესი ბედნიერება მივანიჭო.

“ბარსას” წინააღმდეგ ჩატარებული ბოლო მატჩები? ეს შეხვედრები მარტივი იყო, რადგან კლუბს პრობლემები ჰქონდა, მაგრამ “ბარსელონა” მაინც დიდი გუნდია, შესანიშნავი ისტორიით.

შემიძლია, ნებისმიერ სტილში ვითამაშო – მოკლე თუ გრძელი პასებით.

პეპთან მუშაობის შემდეგ, ვფიქრობდი, რომ “ბარსელონაში” თამაში უფრო გამიმარტივდებოდა. გვარდიოლა დიდებული მწვრთნელია, რომელსაც თავისი ფილოსოფია და ტაქტიკური განათლება აქვს. მასთან მუშაობამ ფეხბურთზე წარმოდგენა შემიცვალა.