ბარსამ კუნდეს ტრანსფერში, შესაძლოა, ჟან-კლერ ტოდიბო ჩართოს

გახსოვთ ჟან-კლერ ტოდიბო? ახალგაზრდა ფრანგ მცველს “ბარსელონაში” თავის გამოჩენის შანსი არ მიეცა, მაგრამ “ბლაუგრანამ” ის, შესაძლოა, სხვა ფრანგი მცველის შესაძენად გამოიყენოს.

“ბარსამ” ტოდიბო 2019 წლის იანვარში ერთ მილიონ ევროდ იყიდა, შემდეგ ფეხბურთელის “შალკესა” და “ბენფიკაში” განათხოვრებით 3.5 მილიონი გამოიმუშავა, ბოლოს კი ჟან-კლერი “ნიცაში” 8.5 მილიონ ევროდ გაყიდა. კატალონიურ კლუბს ტოდიბოს ტრანსფერიდან მხოლოდ 11 მილიონი ევრო არ უხეირია. “ბარსას” ფეხბურთელის მომდევნო ტრანსფერიდან 25% შეხვდება და იმის გათვალისწინებით, რომ 22 წლის ცენტრალური მცველი “ნიცაში” აშკარად ამართლებს, ეს მცირე თანხა არ უნდა იყოს.

თუმცა, შესაძლოა, “ბლაუგრანამ” ამ 25%-ზე უარი თქვას. საქმე ისაა, რომ ტოდიბოთი ინტერესდება “სევილია”, რომელსაც დიეგო კარლოსის წასვლისა და ჟიულ კუნდეს გაყიდვის შემთხვევაში დაცვის ცენტრში სერიოზული პრობლემები ექნება. Sport-ის ცნობით, “ბარსა” ანდალუსიელებს ასეთ პირობებს სთავაზობს – “ნიცადან” ტოდიბოს იაფად გადასაბირებლად კატალონიელები 25%-ზე უარს იტყვიან, სანაცვლოდ კი “სევილიამ” კუნდე 35 მილიონად უნდა დათმოს.

ძნელი წარმოსადგენია, “სევილია” ამ პირობას დასთანხმდეს. ანდალუსიელები კუნდეს მინიმუმ 60 მილიონად აფასებენ, ტოდიბოს ტრანსფერის 25% კი 25 მილიონი ნამდვილად ვერ იქნება. თუმცა “ბარსელონას” მოლაპარაკებების გაგრძელება შეუძლია და ამ 25%-ის სანაცვლოდ კუნდეზე ფასდაკლების მიღება გამორიცხული სულაც არაა.