ჩელსი დე იონგისთვის ბრძოლაში ჩაერთო და დაწინაურდა

ფრენკი დე იონგის მომავალი, შესაძლოა, მოულოდნელად განვითარდეს. აქამდე გასარკვევი იყო, ნიდერლანდელი ნახევარმცველი “ბარსელონაში” დარჩებოდა, თუ “მანჩესტერ იუნაიტედში” გადავიდოდა. ახლა კი საქმეში “ჩელსი” ჩაერთო და საკმაოდ სერიოზულადაც.

“ჩელსის” დე იონგით დაინტერესების შესახებ ინფორმაციას ჟერარ რომერო ავრცელებს, რომელიც იტყობინება, რომ ლონდონური კლუბი “ბარსას” კიდევ ერთი ფეხბურთელითაა დაინტერესებული. როგორც ირკვევა, ეს ფეხბურთელი სერჟინიო დესტია.

Sport-ის ცნობით, “ჩელსი” მზადაა, “ბარსელონას” დე იონგის სანაცვლოდ 60 მილიონი ევრო, მარკოს ალონსო და სესარ ასპილიკუეტა შესთავაზოს.

ცნობილია, რომ “ბარსელონა” და “მანჩესტერ იუნაიტედი” 85 მილიონზე არიან შეთანხმებულები, საიდანაც 65 მილიონი ფიქსირებულია, 20 მილიონი კი ბონუსები. დღეის მდგომარეობით “ბარსას” ტრანსფერებზე შემოსავლის მხოლოდ 33%-ის დახარჯვა შეუძლია, გაცვლის შემთხვევაში კი ეს შეზღუდვა არ არსებობს. აქედან გამომდინარე, გამორიცხული არაა, “ბლაუგრანასთვის” “ჩელსის” შეთავაზება უფრო მიმზიდველი იყოს, რადგან დე იონგში მხოლოდ ფულის აღება და შემდეგ ამ ფულის მარკოს ალონსოსა და სესარ ასპილიკუეტას ტრანსფერებში დახარჯვა უფრო რთული იქნება.

Revelo-ს ინფორმაციით, ფრენკი დე იონგს “მანჩესტერზე” მეტად “ჩელსის” ვარიანტი იზიდავს. ეს გასაკვირი არაა, რადგან ლონდონელები მანჩესტერელებისგან განსხვავებით ჩემპიონთა ლიგაზე თამაშობენ. თუმცა ნიდერლანდელის პრიორიტეტი კვლავ “ბარსელონაში” დარჩენაა.

ჟოან ლაპორტა კვლავ ჯიუტად იმეორებს, რომ “ბარსა” ფრენკის გაყიდვას არ აპირებს, მაგრამ ნიდერლანდელის შესანარჩუნებლად აუცილებელ იქნება, რომ მან ხელფასი მნიშვნელოვნად შეიმციროს. ახალი სეზონიდან კლუბს დე იონგის შენახვა წელიწადში მინიმუმ 40 მილიონი ევრო დაუჯდება.